Allen den, die disen brief ansehent lesent oder ho^erent lesen, tůn ich Kraft Schno^ed¹ kunt vnd vergich offenlich mit disem brief fúr mich vnd fúr alle || min erben, das die beschaiden lút Walther der Scmit in Mettenbach², Cůnrat in Mettenbach vnd Gůta des selben Cůnratz elichú wirtinne, die in den || ho^vf ze Krinnow³ gehorten, sich selber vnd a^ellú dú kind, dú von inen iemer^a) koment ald geborn werdent, mit allen rehten vnd mit aller zůgeho^erd || vsser dem vorgeschriben ho^vf ze Krinnow von mir redlich vnd reht geko^vft hând an minen gena^edigen herren abt Herman vnd an das gotzhus ze sant Gallen⁴ vmb zwainzig pfunt pfenning gůter Costenzer múns, der ich gantzlich vnd gar von inen gewert bin an den stetten, do ich minen schaden nutzlich mit verkomen han, vnd hab och die selben lút mit gůter vorbetrahtung vnd beschaidenhait mit allen rehten frilich vnd letklich vfgeben minem vorgenemten herren abt Herman an sin hand vnd geuertgot ze sinen ze siner nahkomen vnd ze des vorgenemtes gotzhus handen, als reht sitte vnd gewonlich was, vnd hab mich och darúber gen minem vorgenemten herren abt Herman gen allen sinen nahkomen vnd gen dem gotzhus ze sant Gallen enzigen vnd enzich mich mit disem brief fúr mich fúr alle min erben vnd nahkomen aller aigenschaft aller lehenschaft alles pfantschatz aller gewer aller kuntschaft aller besatzung aller zúgnúst lút vnd brief alles rehten gaistliches vnd weltliches gerihtes aller vordrung vnd ansprach, so ich zů den vorgeschriben lúten ald daran hatt oder ich oder min erben von reht oder von gewonhait oder von thainer anderlai sach wegen iemer gewunnin oder erwerben mo^echtin, da mit wir die vorgeschriben lút ko^endint oder mo^echtint angesprechen alder ieman von ir wegen, alder da mit wir wider disen vorgeschriben ko^vf ko^endin oder mo^echtin gereden oder getůn thaines weges oder in thain wis. Ich hab och gelobt fúr mich fúr alle min erben vnd nahkomen, derselben lút vnd des ko^vfs wer ze sinn nah reht gen menglichem an gaistlichem vnd an weltlichem geriht, wa ald wenn ald wie dik des min vorgenemter herr abt Herman sin nahkomen vnd das gotzhus ze sant Gallen ir amptlút ald die vorgeschriben lút bedurfent vnd darumb vfgetriben vnd angesprochen werdent, das wir sú darumb ân allen fúrzug vnd widerred vnd ân allen iren schaden verstan súllen vnd versprechen. Vnd won min vorgenemter herre abt Herman vnd das capittel gemainlich des gotzhus ze sant Gallen sprechint, das der vorgeschriben ho^vf ze Krinnow vnd die lút, die darin geho^erent, von irem gotzhus pfand sigen, darumb so hab ich gelobt mit gůten trúwen fúr mich fúr alle min erben vnd nahkomen, bescha^ech, das sich das befund mit dem rehten bi mines vorgenemten herren abt Hermans ziten oder bi sinen nahkomen, das der vorgeschriben ho^vf ze Krinnow pfand we^ar, wenne denn min vorgenemter herr abt Herman oder sin nahkomen den vorgeschriben ho^vf ze Krinnow darnah lo^esen wend von mir oder von minen erben, so sont inen dú vorgeschriben zwainzig pfunt pfenning, dú mir die vorgeschriben lút ietz geben hand, an der lo^vsung ab gân. Vnd ze offenem waren vrkúnd vnd sta^eten sicherhait aller vorgeschriben ding henk ich Kraft Schno^ed dauorgenemt min insigel fúr mich vnd min erben, die ich hiezů bind, an disen brief. Der geben ist ze Wil⁵, do man zalt von gottes gebúrt drúzehenhundert jar, fúnfzig jar, darnach in dem sibenden jar, an dem na^ehsten samstag nah sant Johans tag ze sunnwendi des Toffers.

Source Fulltext: Chartularium Sangallense VII, Nr. 4488, S. 339-340.