Nos Hainr. dei gracia episcopus totumque capitulum ecclesie Constanciensis ad universorum noticiam deducimus ac tenore presencium pro nobis nostris successoribus et ecclesia Constanciensi recognoscimus et publice confi||temur, quod reverendus in Christo pater et dominus Hermannus abbas monasterii sancti Galli ordinis sancti Benedicti nostre dyocesis Constanciensis suo et dicti monasterii sui nomine prehabito super hoc tractatu inter nos sollempni ac || diligenti recompensam primorum fructuum de ecclesia parrochiali inMarpach et in Altstetten eius filia dicte nostre Constanciensis dyocesis eidem monasterio per nos incorporata et unita nobis et nostre ecclesie Constanciensi || de consuetudine debitorum fecit magis utilem et expedientem, quam quod de eadem ecclesia in Marpach et eius filia exnunc inantea seu decetero singulis ipsius vacacionibus primi fructus nobis et ecclesie nostre Constanciensi darentur. Unde nos considerata utilitate ecclesie nostre Constanciensis ac inter nos matura deliberacione et tractatibus pluribus sollempnibus et diligentibus prehabitis super eo et servatis servandis huiusmodi recompensam primorum fructuum pro nobis nostris successoribus et ecclesia nostra Constanciensi recepimus et admisimus ac dictam ecclesiam in Marpach et eius filiam ac abbatem et conventum supradicti monasterii sancti Galli et ipsum monasterium et perpettuos vicarios vel alios clericos in predictis ecclesia et eius filia exnunc inantea instituendos a solucione primorum fructuum, qui de eadem ecclesia in Marpach et eius filia singulis ipsius vacacionibus nobis et ecclesie nostre Constanciensi deberentur, decetero et exnunc inantea in perpettuum pro nobis nostris successoribus et ecclesia nostra Constanciensi predicta eximimus et exhoneramus, promittentes pro nobis nostris successoribus ac ecclesia nostra Constanciensi, quod de dicta ecclesia in Marpach et eius filia in Altstetten predictis, quocienscumque exnunc inantea vacaverint, primos fructus non exigemus nec petere nec exigere quovismodo possimus nec debeamus nec possint nec debeant, et si in contrarium quidquam per nos vel successores nostros unquam actum factum seu attemptatum fuerit, quod extunc omne dampnum et interesse, quod abbas et conventus dicti monasterii sancti Galli et ipsum monasterium ac clerici in dicta ecclesia vel eius filia instituendi ex hoc incurrant seu quovismodo sustineant, quod illud ipsis plenarie resarcire debeamus et teneamur, ad quod eciam nos nostros successores et ecclesiam Constanciensem astringimus et presencium per tenorem obligamus, renunciantes in et circa premissa omnia et singula pro nobis nostris successoribus et ecclesia Constanciensi excepcioni doli mali, in factum, actioni, condicioni indebiti et ex iniusta causa, privilegio fori et omni tempore quadrimestri et feriato appellacionis remedio, beneficio restitucionis in integrum et canonis hoc ius porrectum et capituli sine excepcione, et generaliter et specialiter omnibus et singulis constitucionibus et^a) defensionibus iuris et facti ac consuetudinibus, statutis, privilegiis, litteris inpetratis et inpetrandis a sede apostolica vel aliunde, per que quas vel quod contra premissa vel aliquod eorum venire vel facere seu obicere quovismodo ingenio vel colore possemus seu possent, et specialiter et expresse iuri dicenti generalem renunciacionem seu refucionem^b) non valere, salvis tamen nobis successoribus nostris ac ecclesie nostre Constanciensi universis et singulis aliis iuribus episcopalibus et archidyaconalibus de ipsa ecclesia inMarpach et eius filia debitis et consuetis decetero integraliter persolvendis. Et in horum omnium testimonium sigilla nostra scilicet nostri Hainrici episcopi et capituli ecclesie Constanciensis presentibus sunt appensa. Datum et actum Constancie anno domini millesimo trecentesimo quinquagesimo nono, XIII^o. kln. mensis iulii, ind. XII^a.

Source Fulltext: Chartularium Sangallense VII, Nr. 4608, S. 449-450.