Wir^a) Bilgri von gottes verhengde abt vnd der conuent^b) gemainlich dez gotzhus ze Rúti¹ dez ordens von Premon||strey in Costentzer bistum veriehen an disem brief offenlich fúr vns vnd all vnser nachkomen, das wir dem ho^vhwirdigen || fursten Cůnen von gottes gnaden abt dez gotzhus ze sant Gallen² vnd dem ietz genempten gotzhus ze sant Gallen || die gnad vnd fruntschaft geta^vn hand vnd in da mit geben vnd verlihen ha^vnd, daz er vnd sin nachkomen ze Túnbrunnen³ vff vnsers gotzhus rehtem aigen ainen wiger machen mugent, vnd durch der selben frúntschaft willen so hat der selb abt Cůn fúr sich vnd fúr sin nachkomen sich des gen vnserm vorgedahten gotzhus verbunden, wenn daz bescha^eh, dz der selb wiger gemachot wurd, daz dann der obgen(empt) abt Cůn vnd sin nachkomen vns vnd vnserm gotzhus ze Rúti von der selben wiger statt dannenhin ja^erlich ie ze sant Martis tag zwen mutt kernen Wiler⁴ messes ze zins geben sont a^vn allen fúrzug vnd widerred dem priester, der denn die kylchen ze Túnbrunnen besingt, oder wem v´ns ald vnser nachkomen ain abt ze Rúti haisset geben. Wa^er aber, daz der vorg(enempt) abt Cůn oder sin nachkomen v´ns vnd vnserm gotzhus den selben zins vff den vorgeschribenn sant Martis tag nút rihtint noch ga^ebint vnd alz lang vss gestůnd, vntz daz ain zins den andern erlúffi, so sol der grund des wassers, der vnsers vor(genempten) gotzhus reht aigen, vnd daz wasser mit den vischen v´ns vnd vnserm vor(genempten) gotzhus gantzlich ledig vnd lo^vs sin, a^vn all ansprach vnd widerred des obgen(empten) abt Cůn vnd sinr nachkomen. Waz ôch^c) der vorg(enempt) abt Cůn oder sin nachkomen vff den wiger kost geleit hand von dem buw ald von vischen, den selben kosten vnd schaden sol der vorg(enempt) abt Cůn vnd daz gotzhus ze sant Gallen ha^vn, vnd sigint wir noch vnser gotzhus ze Rúti in dauon nút gebunden ze tůnd noch ze^d) gebenn. Vnd ze ainem warem vrkúnd diser vorgeschribner ding haben wir abt Bilgri vnd der conuent des gotzhus ze Rúti vnser vnd vnsers conuentz insigel gehenkt an disen brief. Der geben ist ze Ruti in vnserm gotzhus an dem na^ehsten zinstag vor sant Vallentins tag, do man zalt von Cristi gebúrt drúzehenhundert jar vnd drij vnd ahtzig jar.

Source Fulltext: Chartularium Sangallense X, Nr. 5946, S. 118.