Ich^a) Hainrich herr ze Hewen¹ vergih vnd tůn kunt offenlich mit disem brief allen, die in an sehent oder ho^erent lesen, daz ist das min lieber ge||trúwer amtman Walther Yberger von Swartzenbach² an miner statt mit vollem gewalt offenlich ze gericht sass ze Rikkenbach³ in dem dorf || vnder der linden hútt dis tags, als dirr brief geben ist, vnd kam da fúr in in offen gerichte der erber kneht Wa^elti Kofman von || Bůswille⁴ vnd Ma^ehthilt sin elichi frôw, vnd stalte sich da die selb Ma^ehthilt mit Johansen dem Zenggenberg von Rikkenbach irem erkornen vogt mit des vorgenemten ir elichen mans willen v´ber dis nâhgeschriben sach, als reht waz, vnd offenten vnd veriahent da der selb Wa^elti Koffman vnd die vorgenemt Ma^ehthilt sin elichi frôw mit dem vorgenemten ir vogt vnd och mit fúrsprechen vnd sprâchent, daz si mit wolbedâhtem můt von ir kumberhafti vnd redlichen nôt wegen von dem erbern kneht Johansen dem Tekken von Littenhaid⁵ enpfangen vnd in genomen hettint sehs pfunt pfenning gůter Costentzer múns, dero si aller gar vnd och gentzlich von im wa^erint gewert vnd bezalt an den stetten, da sis in iren gemainen redlichen schinbaren nûtz geben vnd bewendet hettint, vnd vmb die selben pfenning hettint si im vnd sinen erben gemainklich vnd vnuerschaidenlich fúr sich vnd fúr alle ir erben ze koffenn geben ains rehten besta^eten vnwiderru^eflichen ewigen kofs ir vogtberes reht aigen gu^etli gelegen ze Bůswille, daz man nemt Wa^eltis Kofmans gu^etli, mit allen rehten nútzzen vnd gewonhaitten vnd mit allem dem, so von gewonhait vnd von rehte zů dem selben gu^etlin vnd darin geho^eret, darúber ich vogt vnd herr bin, daz selb gu^etli woltint si im vertegon vfgeben vnd zů siner vnd siner erben handen bringen, vnd bâtent den vorgenemten minen amtman vnd richter ze erfarn an ainer vrtaild, wie si daz tůn soltint, als reht wa^er vnd daz es kraft vnd maht vnd och hantuesti hett vnd haben mo^eht ietz vnd hernach. Do fragt er vrtaild vmb vnd ward mit gemainer vrtaild ertailt, daz der selb Wa^elti Koffman das tůn solti mit siner hand vnd die vorgenemt sin elichi frôw och mit des vorgenemten ir vogtes hand vnd och mit ir hand mit gelerten worten an des gerichtes stab hin in hand des vorgenemten Johanses Tekken vnd siner erben vnd das daz denn also wol kraft vnd maht vnd och hantuesti hett vnd haben mo^eht ietz vnd hernach, vnd do nam der vorgenemt Johans Zenggenberg die vorgenemt Ma^ehthilten vnd fůrte si ze drin mâlen vsser des gerichtes ring, als im och mit rehter vrtaild ertailt ward, vnd fragte si ze ieglichem mâle, ob si die vertgung vnd vfgebung, als vor ist beschaiden, vnbetwungenlich ta^et vnd wilklich vnd gern tůn wolti, vnd der sait bi sinem aide ze dem dritten mâle, daz si im gesait hetti, daz si es vnbetwungenlich ta^et vnd wilklich vnd gern tůn wolti, vnd nach dem do stu^endent si dar vnd vertgotent vnd gâbent do ze stund die selben Wa^elti Kofman mit siner hand vnd die vorgenemt Ma^ehthilt sin elichi frôw mit des vorgenemten ir vogtes willen rât vnd hand vnd och mit ir hand reht vnd redlich mit gelerten worten an des gerichtes stab, als reht waz vnd mit gemainer vrtaild ertailt ward, daz vorgeschriben gu^etli mit allen rehten nútzzen vnd mit aller zůgeho^erd letklich vnd frilich vf fúr sich vnd fúr alle ir erben hin in hand des vorgenemten Johanses Tekken vnd siner erben ân geuerd vnd verzigent sich och darúber do ze stett bedú gemainlich vnd ietwedres besunder fúr sich vnd fúr alle ir erben letklich vnd frilich och in hand des selben Johanses Tekken vnd siner erben an dem vorgeschriben gu^etlin mit aller zůgeho^erd alles rehtes gaistlichs vnd weltlichs gerichtes aller vordrung vnd ansprach vnd aller der ander sach vnd geuerden, da mit si oder ir erben oder jeman andrer von ir wegen vnd an ir statt daz selb gu^etli mit aller zůgeho^erd nû ald hernach gar oder an dekainem taile kúndint ald mo^ehtint angesprechen in dehainer lay wis ald weg vngeuerlich. Die selben Wa^elti Koffman vnd Ma^ehthilt sin elichi frôw hant och do in gerichte gelobt fúr sich vnd fúr alle ir erben, dez vorgeschriben gu^etlis mit aller zůgeho^erd fúr ain vogtberes reht aigen gu^etli des vorgenemten Johanses Tekken vnd siner erben reht wer ze sinne nach reht gen mainglichem vff gaistlichem vnd vff weltlichem gericht, wenn wa vnd wie dik si des bedurfent vnd notdurftig sint, ân alle geuerd. Vnd dez vnd hierúber ze ainer besta^eten warhait der vorgeschribner ding gib ich Hainrich herr ze Hewen da vorgenemt dem vorgenemten Johansen Tekken von siner vordrung wegen disen brief darúber versigelt vnd besta^etet mit minem insigel von des gerichtes wegen mit rehter vrtaild, doch mir vnd minen erben an v´nsren stúren dienstan vnd an allen v´nsren rehten vnd gůten gewonhaitten in dirr sach gentzlich vnscha^edlich. Dirr brief ist geben ze Swartzenbach vff miner burg an der na^ehsten mitwochen vor sant Martis tag, do man zalt von gottez gebúrt drúzehenhundert jar, ahtzig jar, darnach in dem andern jare.

Source Fulltext: Chartularium Sangallense X, Nr. 5932, S. 105-106.