Allen^a) den, die disen brief an sehent lesent oder ho^errent lesen, kúnd ich Wernher Keller Wernhers sa^elgen des Kellers || von Búzzenswille¹ der elst elicher sun vnd vergih offenlich mit disem brief, als die edlen wolerborn min gna^e||digen herren graf Donat vnd graf Diethelm von Tokkenburg² mir den kelnhof ze Búzenswille verlihen || hant vnd ich den vererschazzet han nach miner brief sag, daz ich da willenklich vnd vnbetwngenlich mit gůter vorbetrahtung vnd beschaidenhait ainen liplichen gelerten aid han gesworn mit vf gebotten vingern, das ich nit anderswa burger sin sol denne hinder der vorgenanten miner herschaft von Tokkenburg oder hinder miner herschaft von O^estenrich, ob mir daz fůglich ist, och sol ich hushablich sizzen ze Liehtenstaig³ in der statt, ob es mir fůglich ist, oder ze Buzzenswille vff dem kelnhof vnd den halten vnd tůn mit allen rehten vnd andern sachan, als ander keller bis her gehalten vnd getan hant. Wa^er och, dz ich zug von der vorgenanten miner gna^edigen herschaft von Tokkenburg vnd hinder denan nit hushablich wo^elt sizzen vnd beliben, es wa^er ab dem kelnhof oder von Liehtenstaig, so sol es vmb den vorgenanten kelnhof stan in aller wise, als e daz ich vf den kelnhof zug vnd den vererschazzet hett, vnd sol man mir doch den erschaz dar vmb nit wider keren, och han ich dannenhin minen eren nit ze kurz getan von des aides wegen. Vnd ist dis alles beschehen mit aller ehafti hantvesti gewarsami worten werchen ra^eten vnd geta^eten, so dar zů gůt núzze vnd notdurftig warent vnd dar zů gehort von reht vnd gewonhait. Vnd dez ze vrkúnd vnd ze merer sicherhait aller vorgescribner ding vnd geding han ich Wernher Keller da vorgenant min insigel offenlich gehenket an disen brief. Der geben ist ze Liehtenstaig an sant Margreten abend in dem iar, do man zalt von Cristus gebúrt drúzehen hundert iar, ahtzig iar vnd dar nach in dem andern jare.

Source Fulltext: Chartularium Sangallense X, Nr. 5910, S. 74.