Allen^b) den, die disen brief ansehent lesent oder ho^erent lesen, tu^en wir die nachgenemten Eberhart von Kúngsegg ritter vnd Albreht¹ sin êlicher sun kund vnd veriehen offenlich mit disem brief fúr v´ns vnd fúr || alle v´nser erben, daz wir mit gůter vorbetrahtung vnd beschaidenhait nach erber lút rat mit dem erwirdigen v´nserm gna^edigen herren abt Georien von gottes gnaden abt des gotzhus ze || sant Gallen² lieplich vnd gu^etlich v´berain komen sient von der vogtye wegen ze Go^vsso^vw³ lút vnd gu^eter, die darzů vnd darin geho^erent, die von dem hailigen rich v´nser gewert pfand ist vmb || hundert mark vnd vmb fünfzig mark gůtes silbers, als die brief wisent vnd sagent, die wir darumb hant, also daz er die selben vogtye ze Go^vsso^vw mit allen rehten von v´ns mit v´nserm gůten willen erlo^eset vnd erledgot hat vmb drúhundert pfund pfenning gůter Costentzer múns, der selben pfenning wir o^vch gantzlich sient gewert an den stetten, da wir v´nsern wahsenden schaden mit verkomen habent vnd gewendet. Vnd habent o^vch darumb ietwedrer^c) besunder gesworn ainen gelerten aid ze den hailigen mit vfgehepter hand, daz wir hinnan ze dem na^ehsten sant Gallen tag, der nu schierost kumt nach dem tag, als dirre brief geben ist, vnd dannenhin inwendig ainem dem na^ehsten jar an dem durlúhtigosten v´nserm gna^edigen herren kayser Karlen oder an sin nachkomen an dem rich, ob er enwa^er, werbent sin súllent vnd schaffen, so wir iemer ernstlichost vermugent, daz die selb vogtye ze Go^vsso^vw mit des vorgenemten v´nsers herren kayser Karlen oder siner nachkomen, ob er enwa^er, hand willen vnd gunst kom vnd geuertgot werd in pfandes wis vmb die vorgeschriben hundert vnd fúnfzig mark silbers in v´nsers vorgenemten herren abt Georien oder siner nachkomen an der abtye vnd in des vorgeschriben gotzhus ze sant Gallen hand, vnd súllent in o^vch darumb versorgen mit briefen vnd mit allen andren sachen, so darzů geho^eret, als er dann notdurftig ist, ân alle geua^erd. Bescha^eh aber, daz wir das mit v´nserm vorgenemten herren kayser Karlen noch mit sinen nachkomen, ob er enwa^er, nút geschaffen noch zůbringen kúndin noch enmo^ehtin, daz sú es nút tůn wo^eltin, so súllent wir oder v´nser erben, ob wir enwa^erint, v´nserm vorgenemten herren abt Georien oder sinen nachkomen an der abtye, ob er enwa^er, die vorgeschriben drúhundert pfund pfenning der vorgeschriben múns gantzlich vnd gar wider geben weren vnd rihten, wenn sú iro fúrbas nút mer enbern wellent, vnd sol o^vch v´nser vorgenemter herr abt Geori vnd sin nachkomen, ob er enwa^er, die vorgeschriben vogtye ze Gosso^vw mit allen rehten nútzen vnd gewonhaiten vnd mit aller zůgeho^erd inne haben vnd niessen, alle die wil wir oder v´nser erben sú der vorgeschriben drúhundert pfund pfenning gantzlich nút gewert habent, als vorgeschriben stat. Vnd daz v´nser vorgenemter herr abt Geori vnd sin nachkomen, ob er enwa^er, der vorgeschriben drúhundert pfund pfenning der vorgeschriben múns dester sicher sient, so habent wir inen darumb ze merer sicherhait vnuerschaidenlich zů v´ns ze búrgen vnd ze giseln geben vnd gesetzt dis nachgenemten fromen vesten hern V^olrichen von Kúngsegg⁴, hern Johansen von Bodmen⁵ den jungern, baid ritter, Johansen der Truhsa^etzen von Waltpurg ⁶, Burkarten von Hohenuels⁷, V^olrichen vnd V^otzen von Kúngsegg⁸ vnd Růdolfen von Ebersperg⁹ mit der beschaidenhait, wa^er daz wir oder v´nser erben vnserm vorgenemten herren abt Georien oder sinen nachkomen, ob er enwa^er, die vorgeschriben drúhundert pfund pfenning gantzlich nút rihtin noch wertin, so sú an v´ns nach dem vorgeschriben zil von inen geuordrot werdent vnder o^vgen ald ze hus ald ze hof mit ir gewissen botten oder briefen, so habent wir die vorgenemten Eberhart von Kúngsegg ritter vnd Albreht sin sun gelopt bi dem aid, so wir hieuor gesworn haben, vnd hant o^vch die selben búrgen gelopt mit irn trúwen in aides wis, wann wir vnd die selben búrgen darnach von v´nserm vorgenemten herren abt Georien oder von sinen nachkomen, ob er enwa^er, ald von ir gewissen botten oder briefen hierumb ermant werdent vnder o^vgen ald ze hus ald ze hof, daz wir v´ns dann baid bi dem aid, so wir gesworn haben, mit v´nser selbs liben mit zwain knehten vnd mit vier maiden vnd die selben búrgen o^vch mit ir selbs liben oder aber ieglicher vnder inen, welher nút selber laisten wil, ainen andern mit ainem maiden nach der ersten manung inwendig den na^ehsten aht tagen antwurten súllent gen Costentz in die statt in offener wirt húser zů vailem gůt, vnd sont da reht vnuerdingot giselschaft laisten ieglicher ie zwai mal an dem tag ân geua^erd, vnd sont o^vch wir noch die selben búrgen noch die, die sú dann an ir statt gelait hant, von der giselschaft niemer komen noch lassen, won mit des vorgenemten v´nsers herren abt Georien ald siner nachkomen willen, ob er enwa^er, ê dz sú der vorgeschriben drúhundert pfund pfenning vnd des schaden, so daruf gat vnd gangen ist, gantzlich werdent gewert vnd vsgeriht, vnd wenn sich vier gantz wochen erlo^vffent nach der ersten manung, wir vnd die búrgen laistent oder wir laistint nút, so hat dann v´nser vorgenemter herr abt Geori oder sin nachkomen, ob er enwa^er, darnach vollen gewalt, wenn sú wend, die selben drúhundert pfund pfenning^d) an ainem schaden ze nemenn vnd ze gewinnen, wie vnd wa sú die selben pfenning vff v´nser vnd vff v´nser erben schaden vinden vnd gewinnen mugent, vnd wie oder welhes weges sú des ze schaden koment, von dem schaden súllen wir vnd v´nser erben sú gantzlich vnd gar lo^esen vnd vnschadhaft machen, vnd habent inen o^vch vmb hoptgůt vnd vmb schaden erlobet, alle v´nser lút vnd gu^eter v´ns vnd v´nser erben daran ze no^etenn ze pfendenn ze heftenn vnd anzegriffenn vff dem land vnd in den stetten mit geriht vnd ân reht ân zorn vnd ân klag als vil vnd als dik, vntz das sú hoptgůts vnd schadens gantzlich vnd gar werdent gewert vnd vsgeriht, vnd sol o^vch v´ns noch v´nser erben noch v´nser lút noch gůt hieuor nút schirmen noch nútz noch gůt sin enkain frihait enkain buntnust enkain burgreht noch enkain ander sach noch fúrzug, vnd wie vnser vorgenemter herr abt Geori oder sin nachkomen vnd ir helfer, die es dann von ir ba^et vnd haissens wegen tůnt, des pfendens vnd angriffens ze schaden koment, von dem schaden súllent wir vnd v´nser erben sú gantzlich lo^esen vnd vnschadhaft machen. Bescha^ech o^vch, dz der vorgenemten búrgen dehainer hierumb bra^ech vnd nút laisti, als vorgeschriben stat, der ist v´nserm vorgenemten herren abt Georien hierumb angúlt mit v´ns worden vnd mag in o^vch hierumb angriffen an lút vnd an gůt ze gelicher wis vnd in allem dem rehten als v´ns vnd o^vch von v´ns hieuor geschriben stat an disem brief. Wa^er dz der selben búrgen dehainer abgieng von todes wegen oder dz er von dehainer ander sach wegen hierzů vnnútz wurd, so súllent wir oder v´nser erben v´nserm vorgenemten herren abt Georien ald sinen nachkomen, ob er enwa^er, ainen andern alz gewissen an des statt geben, der abgangen ist, wenn er an v´ns geuordrot wirt ze hus ze hof ald vnder o^vgen, nach der vordrung inwendig den na^ehsten vierzehen tagen, ta^etin wir des nút, so sont die andern búrgen laisten, wenn sú darumb ermant werdent, alz vorgeschriben stat, vntz das beschiht. Wir die vorgenemten Eberhart von Kúngsegg ritter vnd Albreht sin sun haben o^vch gelopt bi dem aid, so wir haben gesworn, den vorgenemten búrgen allen vnd ieglichem besunder allen den schaden ab zeleggenn, in den sú koment von diser búrgschaft wegen dehaines weges, vnd haben inen vnd iren erben vmb den schaden erlobet, alle v´nser lút vnd gu^eter v´ns daran ze no^etenn ze pfendenn ze heftenn vnd anzegriffenn ze gelicher wis vnd in allem dem rehten als v´nser vorgenemter herr abt Geori, als vorgeschriben stat. Vnd des ze ainer warhait haben wir die vorgenemten Eberhart von Kúngsegg vnd Albreht sin sun v´nser insigel gehenket an disen brief. Wir die vorgenemten búrgen V^olrich von Kúngsegg, Johans von Bodmen der junger, baid ritter, Johans der Truhsa^etz von Waltpurg, Burkart von Hohenuels, V^olrich vnd V^otz von Kúngsegg vnd Růdolf von Ebersperg veriehen ain gantz warhait aller diser vorgeschriben ding vnd das alles das war ist, das von v´ns hieuor geschriben stat an disem brief, vnd ze merer sicherhait der selben ding vnd beding haben wir o^vch v´nsri insigel gehenket an disen brief. Der geben ist ze^e) an dem na^ehsten samstag vor sant Laurencien tag in dem jar, do man zalt von gottes gebúrt drúzehenhundert jar vnd darnach in dem drú vnd sibentzigosten jar.

Source Fulltext: Chartularium Sangallense IX, Nr. 5368, S. 44-47.