Allen, die disen gegenwúrtigen brief ansehent alder ho^erent lesen, kv´nden wir Etzel von Enne vnd sin fettern alle drye Willehelme, Walther vnd Etzel gebrůder von Enne, || hern Růdolfs sa^eligen sv´n von Enne¹, frye herren vnd vergehin des offenlich an disem brief, daz wir alle vier ainberlich gemainlich vnd vnuerschaidenlich mit gůtem willen vmbetwungenlich || vnd mit gůter vorbetrahtvnge nach v´nser gůter frv´nde vnd ander erber lúte rate dem beschaiden man Johansen von Stainâ² vnd allen sinen erben haben ze koffent geben reht vnde || redelich die vogtye ze Nidêren Stainâch³ v´ber die kylchen vnd das var ze Stainâch vnd v´ber lúte vnd v´ber gůt, svnderlich dis lúte, die hie nach benênt sint, daz ist Willi Búrgenderin vnd ir svn Claus, Irmj dv´ A^emma^ennin, Cv^onrat ir svn, dem man sprichet Pôpp, Jv´tzi Rônerin des selben Poppen wip vnd irv´ kint, Anne der selben A^emma^enninen tohter vnd der elicher man Hainrich Sekkiman, Johans vnd Cv^onrat Adelbers sa^eligen sv´n, Elisabethe vnd Ma^ehthilt iro swesterân, des Minneclichen wip vnd irv´ kint, vnd mit namen a^ellv´ dv´ kint, die die obgenanten lút hant, wie dv´ genant sint, knaben vnd tohteran, vnd dv´ lehen, dv´ die selben lúte von v´ns ze lehen hant, vnd swaz ze der selben vogtaye vnd ze den vorgeschriben lúten lip vnd gu^etern ho^ert, es sie mit wasen, mit zwy, mit waide, mit holtz velde, mit akkern, mit wisen, mit wegen, mit stegen, mit abweg, mit wasser, mit wasserlaiti, mit allen nútzen vnd gewonhaiten vnd mit allen rehten gesůchs vnd vngesuchs, benent vnd vnbenent, wissendes ald vnwissendes, das alles lehen ist von dem abt vnd dem gotzhus ze sant Gallen, als wir die selben vogtay v´ber lút vnd v´ber gůt mit allen rehten gehebt besessen vnd genôssen haben her vntz an disen hv´ttigen tag, also haben och wir im die selben vogty mit aller zů geho^erde, als vor ist beschaiden, ze koffent geben vmb vierzek pfvnt pfenninge gůter vnd gnemer Costentzer mv´ns, vnd sigin och der gar von im gewert vnd sint in v´nsern redelichen nûtz komen vnd bekert, als wir vergehin mit disem brief. Vnd haben im och die selben vogtye ze Nideren Stainâ v´ber lút vnd gu^eter vnd die lehenschaft, die die selben lút hant, als vor ist beschaiden, mit allen nútzen vnd zů geho^erden, so wir daran vntz her gehebt haben von gewonhait vnd von reht, gefertigot vnd vfgeben mit des erwirdigen v´nsers gna^edigen herren hant abt Hermans des gotzhus ze sant Gallen⁴. Vnd haben daz alles getân vnd vollefu^ert mit allen den worten werken vnd geta^eten, so darzů hort vnd notdúrftig was nach gewonhait vnd nach reht. Vnd haben v´ns darv´ber alle vier mit ainberem gůtem willen vmbetwungenlich verzigen vnd verzihen v´ns offenlich mit disem brief fúr v´ns vnd fúr alle v´nser erben vnd nachkomen gen dem vorgenanten Johansen von Staina vnd gen allen sinen erben vnd nachkomen aller aigenschaft, aller lehenschaft, aller vordervng, aller ansprach, alles schirmes, alles vszugs vnd alles rehtz gaischelichs vnd weltlichs gerihtz, aller brief, si sigin erworben ald mo^ehtin noch erworben werden vome stůle ze Rome vome riche ald anderswannan, da mit wir ald ieman andre von v´nseren wegen die selben vogtye v´ber lút vnd gůt oder die selben lehenschaft, die dv´ lút hant, ald die selben lút an lip ald an gůt nv^ ald hernach gar ald an ainem tail kv´ndin ald mo^ehtin angesprechen ald da mit dirre redelich vngeuârlich koff kv´nd ald mo^eht in dekain wise gewendet bekrenket ald gebrochen werden, won der selben ansprach haben wir v´ns alle vier offenlich vff die aide, die wir darvmb ze den hailigen gesworn haben, offenlich vnd êweclich verzigen. Vnd wa^er, das inen die selben vogtay lút ald gu^eter, was darzů ho^ert, als wir es an sv´ braht hant, als vor ist beschaiden, nv^ ald hernach gar ald an ainem tail ieman ansprach fúr aigen ald fúr lehen ald mit kainer ander ansprach, des so^elin wir vnd v´nser erben den selben Johansen von Staina vnd sin erben verstân vnd versprechen an gaischelichem vnd an weltlichem geriht vnd an allem^a) stetten, da si sin notdúrftig sint, vnd des ir reht wern sin nach reht, âne alle geuerde. Wir sigin och reht tro^ester bi v´nsern trúwen an aides stat, als ferre wir mv^egent, fúr v´nsern fettern Willehelmen von Ênne, hern Willehelmes sa^eligen svn von Enne⁵ mins des obgenanten Etzels von Enne des eltern brůder svn, das er disen koff vngeuârlich sta^et hab in aller der wise, als wir in getân hant. Vnd so^elin och wir von der selben trostvng niemer ledig werden, er verzihe sich danne vor in des selben Johansen von Staina hant fúr sich vnd sin erben gen im vnd gen sinen erben, als si notdúrftig sint, der selben vogtye vnd lút vnd gu^eter ga^entzelich âne alle geuerde, als och wir ietz darvmb getân hant lûterlich ane^b) alle geuerde, als vorgeschriben stat. Vnd ze warem vnd offeme vrkv´nd vnd sta^eter sicherhait aller dirre vorgeschriben dinge geben wir die obgenanten Etzel von Enne vnd sin fettern Willehelme, Walther vnd Etzel von Enne gebrůder fúr v´ns vnd fúr alle v´nser erben vnd nachkomen dem selben Johansen von Staina vnd allen sinen erben vnd nachkomen darv´ber disen brief mit v´nseren aigen insigeln besigelten. Der brief ist ze Costentz geben, do man von Cristes gebúrt zalt drv´zehenhvndert jar, darnach in dem a^eht vnd ffv´nfzigosten jar, an sant Bartholomes abende dez zwelfbotten.

Source Fulltext: Chartularium Sangallense VII, Nr. 4555, S. 399-401.