Wir Karl von gots gnaden Romischer keiser zu allen zeiten merer des reichs vnd kung zu Beheim embieten || den burgermeister dem rate vnd den burgern gmeinlichen der stat zu sante Gallen vnsern vnd des reichs lieben || getruwen vnser gnad vnd alles gut. Lieben getruwen, vmb die gewonliche stu^ere, die ir vns vnd dem reiche || jerliche schuldig seit zu geben, empfelhe wir euwern truwen vnd gebieten euch ernstlich bei vnsern vnd des reichs hulden, daz ir die vff sante Merteins tag, der do schirst kumftig ist, ie fur sechzenthalben Schilling haller einen guldein dem edlen Johansen lantgrauen zu dem Lu^etemberg⁴ vnserm lieben getruwen vnd niemandes anders von vnsern wegen geben vnd antwurten sullet, vnd wann ir daz also getan hat, so sagen wir euch von disem jare derselben steuwre quijt ledig vnd auch loze. Auch gebieten wir euch ernstlich, daz ir euch an keine ander brieue kern sullet, sunder ir sullet die egen(ant) stu^ere dem vorgen(anten) lantgrauen antworten an alle widerred, wo ir des nicht tetet, so wisset, daz wir dem edlen Fridrich burggrauen zu Nurinberg⁵ vnserm vnd dez reichs lieben getruwen macht vnd gewalt geben vnd ym ouch geboten haben, daz euch dorumb pfenden schol vnd mag. Mit Urkunde diczs brieues vorsigelt mit vnserm keiserlichem insigel. Der geben ist czu Prag noch Cristus geburde dreuczenhundert jar, darnach in dem siben vnd sechczigstem jare, an sant Mathes tag dez heiligen ewangelisten, vnser reiche in dem czwei vnd czweinczigstem vnd dez keisertums in dem dreuczendem jare.

Source Fulltext: Chartularium Sangallense VIII, Nr. 5088, S. 265-266.