Ich V^olrich Windegger vndervogt ze Jo^vnen¹ tůn kunt vnd vergich offenlich an disem brief, daz fúr mich kamen ze Jo^vnen in dem hof, || do ich offenlich ze gerîht sass an Johan von Langenhartz² stat, Heinr. Kalt einunt vnd Aydelheit sin êlichú wirtinn andrunt, || vnd satzte vnd gab do der selb Heinr. willeklich vnd vmbetwungenlich, als gerîht vnd vrteil gab, der vorgenanten Aydelheiten siner || êlicher wirtinn âcht pfunt pfenning Zúr(icher) múntz fúr ir morgengab vff den akker vnd daz wisli gelegen in der Glaserrun³ mit solicher bescheidenheit, wa^er daz der vorbenemt Heinr. abgieng von to^vdes wegen ê dú êbenemt Aydelheit sin êlichú wirtinn, wer dann zů dem vorgenanten akker vnd wislin sprechen wo^elt, der sol der vorbenemten Aydelheiten siner êlicher wirtinn rîhten vnd geben âcht pfunt pfenning Zúr(icher) múntz, vnd alle die wil vnd daz nit beschehen ist, so sol ir der vorgenant akker vnd wisli mit aller zůgeho^erd darumb haft sin als lang, vntz daz beschicht, vnd vertgot ir o^vch die vorbenemten âht pfunt pfenning vff dem obgenanten akker vnd wislin vnd als vorgeschriben stat an min hant in der selben Aydelheiten siner êlicher wirtinn hant, als gerîht vnd vrteil gab vnd als erber lút, die darumb gefragt wurden vnd erteilton vff den eyd, důcht, daz es kraft vnd maht hetti vnd billich haben so^elt nû vnd o^vch hie nach. Vnd des ze einem wâren vrkúnd so han ich der obgenant V^olr. Windegger min insigel nach rehter vrteil vnd durch beider teile bette willen offenlich gehenkt an disen brief. Der geben ist an dem na^ehsten zinstag nach sant Johans tag des To^vffers ze sungichten in dem iâr, do man zalt von Cristus gebúrt drútzehenhundert vnd sêchtzig iâr vnd darnach in dem siben den jâre.

Source Fulltext: Chartularium Sangallense VIII, Nr. 5075, S. 253-254.