Wir Albrecht von gotes genaden bischofe ze Passaw bekennen offenlich mit dem brief, das uns der ersam und beschaiden Christan der Hausler auf gesant hat pei Ulrichen dem Aczenprukcher den zehent ze Razzing, der von uns und von unserem gotshaus lehen ist, und patt uns von des vorgenanten Cristans wegen, das wir den selben zehent ze Razzing lichen den ersamen Gorigen und Jansen den Hausleren seinen vetteren, mit der beschaiden, ob Christan der Häusler abgieng das si dann nur lehentrager des vorgenanten zehents seiner erben waren; sturb aber er an erben, das denn der obgenante zehent Gorgen und Hansen der Häusler rechts lehen von uns war. Nu haben wir angesechen sein fleizzig pet und haben nach seinem willen Gorgen und Hansen den Hausleren den zehent ze Razzing verlichen also das si des lehentrager sullen sein Christans des Hausla^er erben. Gieng aber derselb Christan ab an erben, so ist der zehent ze Razzing ir rechts lehen; und sein auch wir dann des oftgenanten zehents ir herr scherem und gwer, als lands recht ist ze Osterrich und als wir ze recht sullen. Mit urkund des briefs, der geben ist ze Wienn, an sand Othmari tag, nach Christi gepurd dreuzehenhundert jar darnach in dem vierundsechczigisten jar.

Source Fulltext: LAMPEL, Urkunden Sanct Pölten (=FRA II, Wien 1901) S. 1