[11. November 1448] Item die 11. mensis eiusdem facta fuit congregacio in domo facultatis super articulo isto: Ad audiendum supplicacionem domini Iohannis Chirhaim petere volentis, ut a suspensione gradus sibi facta graciose absolvatur. Ad peticionem factam per eundem respondit sibi facultas, quod satis grosse petiverit et non sub verbis humiliacionis, nec apparuit facultati eum fore sufficienter emendatum in moribus. Quare prima facie sibi negavit peticionem et eum non admisit, sed ipse hoc recepit cum duro animo et postea supplicavit attencius et humilius, allegans suam paupertatem et plura alia incomoda, que sibi incumberent, si non admitteretur, et petivit pure propter Deum, ut sibi indulgeretur de suis excessibus, qui multi et varii fuerunt sibi in faciem dicti. Attamen facultas finaliter, mota misericordie zelo, ipsum ad spem melioracionis admisit ista reservans sibi posse, si unquam in futuro excederet, facultas vellet eum excludere a facultate; quod ita assumpsit in nomine Domini fide data.260