[28. Juli 1453] Anno quo supra, 28. die. mensis Iulii, congregata fuit facultas super articulis subscriptis332: Primus ad audiendum supplicacionem duorum doctorum aliarum universitatum et unius licenciati in medicina petere volencium, ut facultati incorporentur. Et primus fuit Mag. Liebhardus Swalb, licenciatus medicine nostre universitatis Wiennensis, qui in Basiliensi concilio recepit insignia doctoralia ex mandato reverendissimi patris etc. episcopi Frisingensis, protunc cardinalis presidentis prefati concilii etc. De quo conclusum fuit, quod debeat admitti ad repetendum unum canonem et disputandum unam questionem juxta tenorem statuti unius; quo peracto possit redire ad congregacionem et petere humiliter facultatem pro ipsius incorporacione.333

Secundus fuit Mag. Godislaus de Polonia, doctor Perusiensis, prout docuit in instrumento publico ,vidimus´. De quo conclusum fuit, quod similiter debeat admitti ad disputandum ut supra juxta ordinacionem statutorum. Qui nunquam post hoc comparuit.334

Tercius fuit Mag. Georius de Amberga335, precedenter hic per facultatem examinatus et admissus pro gradu baccalariatus in medicina. Qui ante determinacionem recessit ad Paduam et ibi stetit, consequenter in Ferraria recipiendo licenciam in medicina, prout per instrumentum publicum sigillatum facultatem informavit. De quo conclusum erat, quod debeat incorporari et, soluta peccunia danda facultati juxta statuta, possit recipere insignia doctoralia in universitate Wiennensi, habita saltem prius dispensacione super promissione Ferrarie facta. Qui recepit insignia et dedit recognicionem debiti pro 2 flor. dandis facultati.336

Secundus articulus fuit ad cogitandum de lectore uno in facultate, ne propter mortem unius lectoris et absenciam secundi scole et supposita negligantur. Et fuit primus Mag. Petrus Volczian de Wienna, qui anno 1453. in vigilia sancti Iacobi diem clausit extremum in pestilencia. Secundus fuit absens Mag. Iohannes Zeller de Augusta, protunc phisicus serenissimi principis etc. domini Ladislai337, Ungarie et Boemie regis, ducis Austrie etc., qui protunc erat in Brunna. Super quo conclusum fuit, quod decanus accedere deberet dominum rectorem universitatis et superintendentes et ipsis eandem necessitatem facultatis proponere; quod factum fuit per eundem. Et quia quidam doctorandus Mag. Caspar de Tetnang attulit literam unam de domino rege Ladislao per medium domini Zilie ex parte prescripte lecture, facultas supersedit, ut patet folio secundo sequenti. [fol. 27r]338

Tercius articulus ad providendum de reformacione stabuli in domo facultatis. Et fuit protunc concorditer commissa structura eadem decano protunc.339

Quartus fuit super supplicacionibus et iniuriis. Super isto venit Mag. Conradus Praun de Muldarff petens sibi pro futura ebdomada congregari facultatem. Et fuit peticio eius exaudita.340