[13. Oktober 1457] In die sancti Cholmanni electus est in decanum facultatis medicine et facta computacione et presentacione ladule cum contentis, plura contenta, que habentur in precedenti decanatu signata, non invenit, ut antiquum librum actorum nec scatulam oblongam475 cum litera magna a Georio, episcopo Pataviensis diocesis, facultati contra empericos practicantes data et cum magno sigillo roborata nec eciam invenit bursam magnam duplicatam, ad quam peccunia fuit semper posita.476

Item fuit eciam motam per decanum de pecunia exposita pro quodam convivio, de qua in precedenti decanatu suo quidam articulus mansit477 suspensus, et respondit Mag. Michael Schrik, quod in suo decanatu esset expeditus. Proposuit eciam tunc decanus, quod non conveniret sibi nec vellet aliquid scribere ad acta facultatis medicine, propter hoc, quod Mag. Martinus Guldein delevit sibi contra suam voluntatem acta, ubi scripsit, quod non valeret concludere bona consciencia, quod aliquid reciperetur de archa facultatis medicine ex parte predicti convivii. Sed doctores tunc presentes desideraverunt, quod propter pacem et concordiam remitteret et indulgeret et sic remisit et propositum mutavit et acta scripsit.478

Fuit eciam motum de Mag. Hainrico Hakcher479 qui contra statuta practicavit et amonitus a practica abstinere noluit, propter quod conclusum fuit per doctores, quod doctores, legentes coram eo, per amplius non legerent, donec se emendaret, sed isto non obstante ipse Mag. Hainricus contra voluntatem et inhibicionem doctorum legencium lecciones audivit et sic non solum doctorem legentem sed eciam audientes impedivit, et ideo fuerunt deputati decanus et Mag. Iohannes Swaiger, ut dominum rectorem visitarent, ut predictum Mag. Hainricum ab audicione leccionum prohiberet et si non amplius, tamen usque ad proximum consistorium, in quo facultas intendit agere contra eum jure. Sed quia decanus consideravit, quod dominus rector cum suis officialibus essent graves, dicentes quod480 lectoria et lecciones essent communes, ideo non possent eum a leccionibus prohibere, de practica autem dixerunt, quod statutum de scolaribus non contineretur in matricula universitatis, ideo non possent secundum illud judicare, et conclusionem in libro antiquo actorum dixerunt suspectam et eciam abrogatam, et contra mandatum regium non possent eum convenienter prohibere; et ideo fuit ille articulus suspensus ad adventum regis Ladislai, qui sperabatur venire ad festum Natifitatis domini nostri Iesu Christi de Bohemia ad Wiennam cum gaudio. Sed quia regia maiestas in die sancti Clementis481 cecidit et vitam in domino consummavit et quod sperabatur gaudium conversum fuit in luctum, et sic adhuc manet iste articulus suspensus.482.