[27. Februar 1465] Item in die Cinerum, facta cena ad expensas facultatis per doctores eiusdem, congregati et convocati erant singuli appotecarii in facto practicancium contra consensum et ordinaciones facultatis atque eorum, qui medicinas distribuunt in preiudicium appotecariorum. Conclusit facultas subservare infra scripta:

Quoniam medicina est sciencia, qua humani corporis quietis, salutis et spei queritur refrigerium, ut a morbis589 se tueantur homines et preservent atque ut morbidi ab eisdem pro posse divina favente clemencia restaurentur, interest nobis doctoribus, ut in eadem sollicitudine omni qua possumus et scrutinio procuremus, ne temeriter aut nequiter practicantes jacturam et destruccionem humanorum corporum atque homicidia soleant amplius frequentare. Statuit igitur in primis facultas tum pretextu privilegii et ordinacionis sacri concilii Basiliensis, tum vigore novi privilegii invictissimi principis domini Friderici, Romanorum Imperatoris semper augusti etc., ne aliquis empericorum aut alius temerario ausu preter facultatis consensum in civitate Wyennensi practicet, nisi sit doctor approbatus per aliquam universitatem, de quo facultas plenam habeat cognicionem per patentes literas aut testes, aut se submittat ad respondendum publice coram facultate, ita ut eiusdem ars et sciencia sint plurimum per nos edocte. [fol. 57v] Et ut hoc lacius suum sorciatur effectum, oportet aliqua singulariter observare, ne detur locus malefaciendi et practicandi cum dispendio et jactura hominum, tum quantum ad appotecarios, tum et ad doctores.

(1.) Primum de appotecariis observandum est tale590: Ne aliquis appotecariorum contra prescriptum statutum facultatis medicinas alicui taliter prohibito administret neque per se nec per alium subordinet tacite aut expresse aut quovis alio modo.

(2.) Secundum de appotecariis observandum591: Ne aliquis eorum medicinas farmacantes, ut sunt pillule aut alie medicine laxative sive solutive effrenitantes, indifferenter ad voluntatem et postulacionem cuiuscumque extra suam appotecam audeat [dispensare], nisi per scienciam et velle aut mandatum alicuius doctoris facultatis eiusdem aut alterius non doctoris habentis expressum consensum facultatis practicare in eadem.

(3.) Tercium conclusit facultas de appotecariis592: Ceterum perswadet vobis facultas, quia frustra leges conduntur, nisi quis manu forti sataget easdem observare, ut unum aut duos inter vos preficiatis veluti manutenentes illas observaciones, cui aut quibus alii per juramentum aut fidem compromittant hec singula inviolabiliter observare; quod si aliquis eorum contravenerit, procurent ipsi talem sine gracia puniendum juxta ipsius demeritum, que tunc pena per hos duos aut plures ex eis, si necessarium fuerit593, erit arbitranda.594

Observanda per doctores facultatis:595

(1.) Primum est tale, quod si quisquam appotecariorum sua temeritate aut quacumque alia via inductus in contrarium prefatorum statutorum facere presumpserit, cognita de hoc certitudine, que singulariter per omnes doctores nostre facultatis aut indifferenter quoscumque alios erit indaganda et mox ad facultatem et aures doctorum denunccietur, precipimus et mandamus singulis suppositis nostre facultati subiectis, ne aliquis eidem appotecario aliquam receptam scribi soleat aut permittat, sed absolute omnes suos pacientes ab eadem appoteca repellat aut prohibeat.596 Quod si aliquod suppositorum sive doctorum, minimus aut maximus, contra hoc facere contravenerit, maneat talis doctor a facultate sine gracia exclusus, quousque emendatus fuerit sufficienter. Quod si aliquis scolarium sciens talem prevaricacionem per aliquem appotecarium fieri, et ad facultatem sive decanum eiusdem non detulerit, maneat talis a facultate suspensus ab omni promocione, quousque veniam merverit.

(2.) Pariter conclusit facultas in favorem appotecariorum, ne videantur eis esse preiudiciales, ne aliquod suppositum nostre facultatis swadere audeat aliquid aput herbularios sumendum, sed singula ad appotecas scribantur, aut aliter per verba recipere procuret aut disponat. Quod si quis contrarium fecerit, penam facultatis non evadet.

(3.) Deinceps mandat facultas, nullum ex suppositis nostre facultatis habere concurrenciam cum aliquo practico non habente expressum consensum facultatis sub penis ut supra.597 [fol. 58r]

(4.) Pro doctoribus. Placuit denique facultati habere assistenciam appotecariis pro repulsa herbulariorum pro posse prosequenda et maxime per litteram imperialem, que in se continet repudiacionem illorum, ita ut absorpti in civitate Wyennensi eorum pati presencia non permittatur.

(5.) De religiosis. Demum placuit facultati, quod omnes moniales practicantes aut medicinas qualescumque vendere presumentes, ut aquas, cristeria etc., prohibeantur598 cum assistencia appotecariorum mediante littera domini Pataviensis ab huiusmodi mercanciis aut practicis. Quod si fuerint alie persone religiose non subiecte jurisdiccioni ordinarii loci, presumentes agere sua ambicione aut cupiditate contra prenominatas ordinaciones, coherceantur per comminaciones, videlicet tales, quod domini doctores in suis egritudinibus non velint eis nec prece neque precio persuadere aut assistere. [fol. 59r]599

Feria quarta post Letare. [fol. 59v]600