[11. August 1467] Item 11. die mensis Augusti congregata fuit facultas ad deliberandum super articulis infrascriptis, quorum primus fuit ad audiendum peticionem domini doctoris, videlicet Mag. Nicolai de Ratisbona, qui rogavit sibi domum locari facultatis a festo sancti Michaelis per annum futurum, et facultas annuit. Et locavit sibi pro 6 flor. Ungaricalibus, et fuit contentus illos flor. 6 persolvere.

Secundus articulus fuit ad audiendum oracionem domini doctoris, Mag. scilicet Erasmi de Ratisbona, qui petivit facultatem medicine, ut eum in suum condoctorem reciperet, et peticio sua exaudita est et incorperatus est ad medicine facultatem et admissus concorditer per omnes doctores.

Idem doctor dedit 4 flor. Ungaricales ad facultatem medicine. 623

Item in eadem congregacione exposui pro vino, simulis, piris 17 den.

Item habitis istis articulis, facultas deliberavit, quid expediret ex parte cuiusdam mulieris vetule in Kranaw supra Tulnam residentis, que indocta et certe inexperta practicavit. Placuit omnibus doctoribus, quod fieret additus ad dominum officialem; quod factum est. Qui quidem annuit peticionibus facultatis et prefatam vetulam citavit. Comparuit coram domino officiali Mag. Alexio, domino doctore sacri juris canonici, et tota facultate, et examinata reperta est emperica et inexperta624 in sua practica; tandem dominus officialis eam prohibuit a practica sub pena excommunicacionis, et ita a nobis discessit.625

Item dedi notario domini officialis pro duabus citacionibus 24 den. ex parte mulieris de Kranaw, que citata fuit, et ex parte cuiusdam sacerdotis nomine Petrus in Krems morantis, practicantis626 contra privilegia facultatis, cum ipse sit empericus.