[26. Oktober 1554] Die 26. Octobris dominus Huetstokher, consul Viennensis, oratum habuit dominum rectorem magnificum doctorem Franciscum Emericum, ut, duobus sibi adiunctis sui ordinis et facultatis viris, xenodochium civium visitare dignaretur. Adscivit itaque sibi dominum doctorem Lazium, Rom. Regie Maiestatis historiographum dignissimum, et me decanum. Visitavimus xenodochium, sed quoniam ob frequentem medicorum mutationem inconvenientia multa comperta sunt, in rem et xenodochii et pauperum egrorum existimavit futurum magnificus dominus consul, si medicorum quispiam in ordinarium eius loci medicum ab inclita facultate medica eligeretur, qui vigilantiori cura languentium haberet rationem, frequentiusque illos inviseret, cuius diligentiam pari gratitudine se aliquo honorario a senatu deputando compensaturum recepit.925 Isthec quum magnifico domino rectori ac nobis petitio iudicaretur honesta, ut senatui Viennensi gratificaremur, totam facultatem convocavi huncque articulum deliberandum proposui, quo tempore, 8. Novembris926, ego in physicum xenodochii ordinarium electus sum, omnium votis suffragiis et pari singulorum consensu, cum alioquin privatim magnificus dominus consul a senatu duos mitteret senatores ad magnificum dominum rectorem, eum ut oratum haberent, quo velit me prae ceteris eligere, quia alias etiam fueram grassante pestilitate de eorum republica bene meritus, ipsos me imprimis exoptare, ut me promoveret, quod ita factum est. Quare hoc munus satis laboriosum in gratiam civium et aegrorum suscepi, quo fungor quam possum vigilantissime. Exposui in prima congregatione 12 kruc. [fol. 179r]