[8. April 1596] IV. congregatio. Die 8. Aprilis anno 96 convenerunt apud me domini doctores facultatis nostrae, quibus proposui libellum supplicem nobilis et clarissimi domini Guidi Anthonii Scarmilionii, philosophiae et medicinae doctoris Itali, petentis ad repetitionem admitti et puncta publico examini committenda sibi designari.

Quia vero doctoratus sui testimonium nllum secum non habebat et res novi exempli videbatur, citra depositionem testimoniorum doctorem ad repetitionem admittere, idque statuta collegii nostri penitus inhibeant, responsum fuit, ubi fide digna doctoratus sui testimonia attulerit, nihil ei denegatum iri. Interim tamen reverendissimum dominum cancellarium hujus rei per occasionem informandum, quod per me factum.

Secundo, perlectae sunt literae domini Joannis Cupii medicinae doctoris, quibus facultati suam operam defert et si forte contingat medicos ad castra mittendos, illi prae reliquis munus istud committendum, eoque etim promovendum esse, ut sperat ita instat. Visum est dominis doctoribus deliberatione facta praefato D. D. Cupio nihil penitus in hac causa ad suas responsi dandum esse literas.

Tertio, venerandus dominus senior, D. D. Diomedes Cornarius mentionem fecit libelli de morbo contagioso populariter grassante edendi, datae informationis per me urgendae. Quia tamen reliquis dominis doctoribus consultius videbatur, ita quiescendum nec ulterius instandum esse, intermisi. [fol. 365v]