[14. Mai 1596] 14. Maii quarta congregatio celebrata est, in qua facultas medica [fol. 368v] conclusit, supplici libello D. D. Perghoferi pro ultima medica professione instantis apud magnificum dominum rectorem et venerabile consistorium ejusmodi informationem inscribendam esse:

Magnifice domine rector, venerabile consistorium. Quandoquidem nobis constat, D. D. Paulo Perghofero citra omnem contradictionem absolute in proximo consistorio ultimam medicinae professionem collatam esse, nemine etiam denuo in plena facultatis nostrae congregatione contradicente, nulla informatione ulteriori opus esse judicavimus. Decanus et facultas medica.

D. D. Scarmilionio ante aphorismi 19 sectionis secundae aphorismorum Hippocratis assignationem, quem sorte elegerat pro repetitionis actu in unius mensis spatio celebrando, serio per me decanum injungebatur ex magnifici domini rectoris et venerabilis consistorii decreto (ut patet ex supra scriptis annotationibus 10. die Maii), ut in posterum se benevolentiorem erga decanum et facultatis medicos gereret quam ab ipso hactenus factum est praeterea, ut in biennio originale doctoratus sui testimonium afferret. Promisit, se praestiturum.

Eidem D. D. Scarmilionio imponebatur, ut comitante eum D. D. Magno accederet reverendissimum dominum universitatis cancellarium, ad praestandum solitum juramentum ante suam disputationem.