[21. November 1596] I. congregatio 21. Novembris 96. In ea lecta fuerunt atcta decanatus domini senioris D. D. Cornarii et [fol. 373v] approbata utque in librum actorum referantur, concessum. Fuerunt praeterea in medium prolatae literae doctoratus D. Martini Cutigii, admissionem ad facultatem petentis et approbatae. Item quia sub praecedenti decanatu fuerat admissus D. Scarmilionius Italus, qui originale privilegium sui doctoratus secum non habuerat sed extractum quoddam ex protocolo Patavino sibi procuraverat, ei injunctum a venerabili consistorio fuerat, ut vel originales literas vel aliud magis authenticum testimonium adferret idque spatio duorum annorum.

Quare is praeoccupans instrumentum notarii manu conscriptum, prioratusque Patavini sigillo confirmatum et cum authentica practoris Patavini factum offerens, cum non esset in consueta academiarum Germaniae forma, difficultas a facultatis doctoribus mota fuit, resque ad magnificum dominum rectorem et venerabile consistorium pro decisione delata.

Eadem congregatione fuerunt ad facultatis consilia admissi D. D. Matthias Rudolphus et Joannes Geusius,702 nuper tum doctores promoti. Solvit unusquisque pro admissione cruc. 45.

Eadem die balneator quidam Joannes Fendt zu Ebenfurth a senatu Viennensi pro chirurgo civilis xenodochii promovendus, se coram inclyta facultate examinandum constituit. Viso autem ejus et nativitatis et disciplinae testimonio examinatus fuit a praesentibus D. D. Benedicto Pergero, Paul Perchoffero, Matthia Rudolpho et Joanne Geusio qui sane balneator frigide satis ad interrogata respondit, ob idque per facultatem decretum fuit, ut ipsi approbatio non concedatur, nisi per anni spatium Mag. Daniel, qui hinc temporis curam xenodochii chirurgicam gerebat, polliceretur, se eum sub disciplina sua retenturum instructurumque. Quod sane a me Mag. Danieli dictum exprobatumque simul fuit, qui talem ad examen promoveat, qui idoneus minime repertus sit. Pollicitus autem est stipulata manu, se per anni spatium eum apud se recepturum instructurumque.

Solvit autem pro examine dictus balneator flor. Rhen. 3.