[9. März 1597] 9. igitur Martii convocati sunt ad illius examen sequentes doctores: Magnificus dominus rector Joannes Leander, dominus senior D. Cornarius, D. D. Benedictus Pergerus, D. D. Paulus Perchofferus. Qui visis ipsius disciplinae literis et nativitatis testimonio, consideratisque, quibus uti consueverat, ferreis instrumentis (non obstante quod anno 1593 sub decanatu D. Georgii Mosbachii) rejectus fuerit, eo quod testimoniales literas neque firmam ullam mansionem haberet) cum modo jus civium peteret et a Viennensi senatu spes illi facta sit, examinatus fuit in tribus hisce punctis, scissionis calculorum, herniarum et suffusionis, quibus satis bene ad interrogata respondens satisfecit et a facultate approbatus est. Verum cum adhuc civis non esset, ne aliorum civium juri quippiam detraheretur, non datum est consuetum testimonium, sed rescripto Viennensis senatus responsum fuit, ipsum examinatum esse et idoneum repertum. Ubi autem in civium numerum fuerit, ascitus, tunc statutum est, ut facto prius consueto juramento ipsi [fol. 376v] consuetum autenticum testimonium elargiatur, moneaturque, ne in nundinis tale testimonium, ut circulatores solent ostentationis gratia pandat. Deposuit autem pro examine flor. Rhen. 8.