[3. September 1564] 3. Septembris. Instituebatur in congregatione primum generalis quaedam de illa apothecariorum ordinatione disputatio. Sed cum perpenderent domini, eam conditam esse a d. Ferdinando feliciss. memoriae et nobis ab excelso regimine mandari executionem, noluerunt ampliorem ea de re instituere deliberationem. Putabant singulis incumbere, ut illi ordinationi quisque quantum in se esset obtemperaret.

Quod ad mandatum regiminis, quo aliquem nominari volebant pro visitatore, unanimi consensu putabant domini, illud honoris gratia deferendum esse D. Lazio seniori, si modo id in se recipere vellet, sin minus nominandum esse D. Doctorem Mathiam Cornax.

Cum autem D. Lazius id recusaret, nominatus est excelso regimini D. Cornax cum anexa petitione, ut domini de regimine velint privilegia nostra, cum haec et similia onera soli doctores facultatis nostrae subire coguntur, posthac defendere et illesa servare, quod peculiariter in hac congregatione faciendum esse concluserunt domini. [fol. 51v]

Cum praepositus D. Stephani, cancellarius universitatis jam aliquoties promovendis difficultatem movisset ob religionis negotium, nullos enim promovere volebat in posterum, nisi qui per omnia Romanam fidem sectarentur et id circa istud tempus etiam in quodam juris candidato tentasset, facultas medica rem ad sacram caesaream majestatem detulit, quae subsequente decreto hujusmodi inquisitionem et examen d. cancellarii sustulit. Est autem illud decretum: