[13. November 1591] XIII. Novembris examinabatur Simon Merckh von Zemmetshausen Suevus futurus balneator im Rottgässl.. Novit scribere et legere attulit literas testimoniales tam nativitatis quam disciplinae. Examinatores fuerunt clarissimi D D. Haustein, Cornarius, Perger et ego decanus.

Hic balneator cum non adeo bene ad interrogata responderet ex gratia saltem a dominis examinatoribus est admissus. Et repulsam sine omni dubio passus fuisset ni contractum jam matrimonium cum vidua relicta sui antecessoris ei quasi patrocinium attulisset. Placuit tamen d. doctoribus tum praesentibus ne in hujusmodi casu talia matrimonia ulli alii inposterum sint adjumento. Tandem (praemisso tamen bono ut meritus erat capitulo) solitum praestitit juramentum. Accepit testimonium et solvit facultati 3 flor. Pro manuali operatione composuit in mea praesentia emplastrum nigrum quod vulgo das Stichpflaster vocatur et unguentum aegyptiacum quam operationem satis feliciter peregit.

Hunc praeterea Simonem Merckh non praesentarunt dominis examinatoribus duo balneatorum magistri cum tamen ex consuetudine hactenus semper observata ad hoc praestandum fuerint adstricti et examinando Simoni antea promiserint. Quos sane balneatorum magistros nimirum Philippum Breuner [fol. 333v] auf der hohen Brucken et Bernhardum Jager im Cantzley-Badt inclyta facultas ob hoc singulariter repraehendendos esse censuit.

Eodem quoque 13. Novembris die a quatuor praonominatis d. doctoribus in locum Sebastiani Götz pharmacopolae pie defuncti pro examinatore pharmacopoeorum surrogatus est Poppo Müeller apotecarius quem deinde una cum aliis dominis visitatoribus et examinatoribus sub secundo D. Judicis decanatu electis excelso regimini scripto denominavi.