[28. September 1667] Die 28. Septembris die S. Wenceslai mane inter 7. et 8. feliciter peperit Margarita Austriaca imperatrix nostra Ferdinandum Wenceslaum. Chronosticum: Nato Ferdinando Venceslao Totus Gaudet Orbis. Visitata sunt omnia pharmacopolia et bene inventa.

Missum est decretum pharmacopoeis ut categoricam attestationem darent utrum facultas in communi vel in particulari eos ad pretiosa convivia coegisset et non responderunt quod aliquando suspectum est adeoque insistendum. Hic potenter actum est contra fratrem misericordiae Italum practicantem. Die 27. celebravimus festum Ss. Cosmae et Damiani.

IX. congregatio. Lecta sunt acta D. Ludwig. Conclusum est ut imposterum nullus ad facultatem admitteretur nisi qui esset magister promotus. Si autem talis aliquis ad facultatem anhelaret ut depositis prius [fol. 337r] 12 imp. vel sub ipso examine vel in assignatione aphorismi propositas aliquot philosophicas quaestiones solveret et a decano vel ab alio ad hunc actum designato magisterii gradum reciperet. Id conclusum fuit ne imposterum sese mendaciter scriberent phil. ac. med. doctores secundo ne indocti et vix humanioribus bene imbuti adeoque empirici in facultatem nostram irreperent.

Citatus comparuit Andreas Bais pseudochymicus et inventus est minus habens quod doctoratum a turba philosophorum tantum in imaginatione haberet adeoque conclusum est ut ipsius exclusio apud suam majestatem urgeretur ad quod impositum est regimini ut renovata et confirmata nostra privilegia defenderet adeoque per decretum totaliter inhibita fuit praedicto Bais praxis medica. Conclusum item fuit ut per pedellum poena seu mulcta exigeretur. Non paruerunt sed contra facultatem supplicarunt consistorio. Respondimus sat ample sed non replicarunt.