[22. September 1669] VIII. congregatio 22. Septembris. [fol. 354v] Iterum

supplicarunt Michael Noss, Rudolphi et Bock pro materia disputationis et concessa

est.

Supplicarunt chirurgi aulici quatenus liceret sibi cum chirurgis civicis in festo Ss.

Cosmae et Damiani secundum examen incedere et sequens ordo ipsis a facultate

praescriptus est nempe ut senior civium chirurgus primum occuparet locum deinde

sequerentur chirurgi personae tertio ut civici et aulici secundum examen

procederent ad offertorium. Sed cum reluctarentur ipsis ex utraque parte bene

contentis conclusum est ut in festo Ss. civici decano comitivam darent irentque soli

ad offertorium aulici vero decano inservirent in festo corporis Christi.

Item supplicavit Andreas Ludovicus Morell med. stud. pro materia disputationis pro

exercitio sed re infecta discessit.

Item petiit a facultate auxilium D. Schönaich, Wernerianarum prolium tutor contra

dom. Strelle j. u. dr. qui ipsi prioritatem surripere tentabat et cum ab immemorabili

tempore defunctorum medicorum pupillis semper primarius tutor medicus fuerit

sitque res magni momenti pro conservatione pupillorum conclusum est ut ipsius

partes defendendas apud consistorium susciperem quod et tum per libellum

supplicem tum etiam oretenus perfeci diligentissime. [fol. 355r]

Foemina quaedam accusavit balneatorem in balneo judaico quod medicamento

purgante suum maritum occidisset jussaque est suam hanc querelam in scriptis

dare.