[14. Juli 1676] VII. congregatio 14. Julii. Propositus fuit libellus supplex caesari exbibitus a caesare ad regimen ab hoc decano pro informatione remissus cujus author fuit empiricus Christophorus Fride alumnus alterius empirici Adami Perl, qui in vivis facultati per temerarias suas curationes multum negotii fecit hoc anno autem a milite quodam confessus periit. Rogat autem Fride majestatem, quatenus gratiosissime concedat, ut artem omnis [fol. 409r] generis morbos tam internes quam externos curandi quam cum suo hospite Adamo Perl per aliquot annos habuisset commnunem et communi opera cum eo exercuisset solus imposterum libere et sine impedimento facultatis exercere possit.

Petiit D. Sorbaith ut sibi tanquam superintendenti fundationis Geislerianae et cui incumbat istam fundationem integram semper conservare ejusque rationem consistorio reddere facultas reversales dare velit quod 400 flor. ex praedicta fundatione ipsa receperit operamque dare velit ut pecunias istas exponat quam primum secura in hunc finem evenerit occasio. Consensit facultas. Nominati fuerunt duo doctores facultatis D. Schubert et D. Resch qui D. Christiani Rechperger viduam et haeredes adeant ipsisque injungant quatenus acta non modo cum expensarum sed etiam acceptorum specificatione tradere vel si id recusarent alium inducerent titulum et sub praetextu voluntarii alicujus muneris facultati satisfacerent.

Chirurgi ab aula privilegiati rogant, ut civicis chirurgis responsum in causa praecedentiae tanto tempore sollicitatum nunquam autem ab ipsis hactenus praestitum sine ulteriore mora facultati exhibeant. Quia vero eodem die chirurgi civici moram satis frigide excusarunt quasi ob defectum quorundam scriptorum imperatam sub mulcta 12 ducat. responsionem intra 14 dies praestare non potuissent consensit facultas petitioni aulicorurn chirurgorum et non modo sub actuali exactione mulctae modo dictae sed etiam sub poena duplici dandum intra 8 dies responsum civicis chirurgis iterum imperavit.

Quia per advocatum nostrum intelleximus quod acta contra Andream de Bassis nec apud notarium universitatis nec in regime neque apud aulae intimos secretarios indagari et inveniri amplius possint sed pro perditis vel potius fraudulenter omissis habeantur conclusit facultas actionem de novo inchoandam esse, quod factum est.