[10. Oktober 1612] Decimo Octobris decimam non levi de causa celebrari expediebat congregationem. Non enim non puniri debebat Soldinus in facultatis mandatum suamque propriam apothecariorum datam legem pertinacissime impingens.

Statuit facultas ejus per universitatis pedellum senatorio uno adjuncto servitore officinam simpliciter occludendam. In quem finem tres in sequentem diem facultatis doctores in commissarios ad consulem electi fuere D. D. Piripachius, Rechpergerus et Geisler. Ordinata haec ad consulem praesalutatio intermissa fuit ea enim hora qua orandus consul adiri debebat facta inter quosdam dominos doctores titubatio quasi consul interpelandus? Secunda intermissionis ratio. Expectandum autumabant donec apothecariorum adversus inclytam facultatem ad excelsum regimen data gravamina pro informatione ad facultatem transmittantur. Tunc enim et simul ad gravamina respondere et caesarea facultatis privilegia cum justa informatione coram regimini ostendere poterit facultas. Exinde profecta mora omnes paritor apothecarii illicitas parere receptas coeperunt. Conclusum et tunc in Paganum fuit et ejus asseclam Borasium Tridentinum ut (si haberi castigandi poterint) in carceribus tam diu detineantur captivi donec de ipsorum non toleranda malitia excelsum informetur regimen. Ultima congregatio. Pedellus primo occurrebat qui propter frequentia elapsi semestris officia aliquid praeter solitum salarium addi petiit. Nobilis et clariss. D. D. Huebner de continuando advocati officio certoque annuo salario certior esse cupit. Quid denique post tot solennes easque serio in externos medicos factas conclusiones agendum?

Ad singula respondit inclyta facultas dicens pedello pro laboribus dandum pro nunc florenum. In confirmando advocato ejusque annuo statuendo salario ob temporis brevitatem [fol. 51 r] nihil penitus concludere potuit facultas unde tractandum negotium in aliud tempus differri debuit. In externos medicos conclusit facultas apud magnificum dominum rectorem accusandos esse. Ex pluralitate votorum confirmor post resignationem decanus. Percepta: A D. D. Piripachio exdecano 8 tal., ultima die resignationis decanatus officii ab eodem 8 cruc. et 5 ducatos, a D. D. Golnero 2 ducatos cum Rudolphino tallero. Pro solita in facultatis librum inscriptione ab eodem florenum. Summa: 36 flor. 44 cruc.

Impensae: Bajulo pro cistis allatis 20 cruc, pro recepto ab inclyto Viennensi senatu responso civiles apothecarios concernente 9 cruc. Pro captivo facto Elia Halphame Judaeo 24 cruc. Pro Martiis panibus, Cretensi optimo vino, saccharo, pro panibus consuetis oblongis aliisque pertinentiis in festo divorum Cosmae et Damiani 5 flor. 8 cruc, aedituo 15 cruc, organicini et cantori singulis 1 tal., pedello 30 cruc. Amanuensi syndici [fol. 51 v] universitatis pro descripta invitatoria et publice legenda scheda ad festum divorum Cosmae et Damiani 12 cruc. Cantori pro funebri in templo D. Stephani figurali cantato 12 sol., sacristano pro eodem solenniter cantato sacro 4 flor. 4 sol. Pedello pro salario 3 flor. 45 cruc, lictoribus pro incarcerato Pagano 24 cruc, dein incarcerando 27 cruc. Summa: 21 flor. 22 cruc. Restant: 15 flor. 22 cruc. L. D. B. M. M. S. V. [fol. 52r]

[1612/1613]

Acta decanatus II Lucae Golerey Labacensis Carniolani phil. et med. dr.