[27. November 1621] In prima congregatione 27. Novembris D. D. Geisler sua acta perlegit quae approbata fuere.

Deinde decretum regiminis ratione magisterii sanitatis perlectum est in quo et augmentum salarii in futura diaeta provinciali et habitatio magistro sanitatis pollicebatur. Ad hoc decretum responsum voluit facultas se nullum penitus nancisci posse qui officio tam periculoso praeesset neminem quoque cogere

posse. Decretum saepius nominatum lit A. magistro sanitatis Seldenreich traditum

non recuperavi.

Antequam vero scriptis mandarem hanc collegii nostri responsionem ipsemet adivi

D. D. Henricum Massucam qui per libelum mentem suam aperuit quod inaudiens

D. D. Seldenreich qui antea saepius admonitus officium renuerat expedito supplici

libello B. patronos accessit et quod antea recusarat ursit et obtinuit praestititque

excelso regimini juramentum et in magistrum sanitatis electus est.

Eadem congregatione D. Rechperger pharmacopolarum examinator ordinarius

omnium votis declaratus est.

Jacobi Liewalts petentis ad examen pro magisterio in arte pharmaceutica libellus C

perlectus est. Notandum quod senatus Viennensis huic pharmacopolae provisori

ad coeruleam officinam emptionem dictae officinae ratificare noluerit nisi prius a

facultate medica per examen dignus judicaretur. Facultas visis tum natalitiis tum

disciplinae et servitii testimoniis eundem ad examen admisit. [fol. 108r]