[4. Juli 1634] III. congregatio 4. Julii. Lectum est decretum a consistorio transmissum quo nomine suae majestatis per excelsum regimen facultati significabatur: Licet dominus Christianus Schäffler praefati regiminis cancelarius officium superintendentis academici tam propter senectutis morbos tam plures alias graviores occupationes resignaverit placuisse tamen suae majestati eundem ad vitae dies in superintendentis officio confirmare eidemque dominum Georgiurn Puelerum j. u. dr. et in dicto regimine consiliarium pro vicario deputare. Conclusit facultas suae caesareae majestatis voluntatem pro lege habendam et protocollo esse inscribendam.

Decreto significabatur facultatem theologicam fecisse statutum ut quivis doctor in publico universitatis actu comparens si non habitu academico saltem epomide et bireto a caeteris discretus accederet idque statutum caeteris facultatibus pro intimatione intimandum petiisse. Respondit facultas hoc in archigymnasio Viennensi jam a seculo et hominum memoria moris non fuisse. Facultati theologicae liberum esse suis doctoribus hoc injungere ad unius tamen statuti observationem aliorum facultatum doctoros minime possent obligari. [fol. 158v] Prolatum insuper tertium consistorii decretum quo facultati certior reddebatur P. Guilielmum Lammormain domino superintendenti caesareo significasse se pro domo academica nova patrum societatis templo vicina et necessaria obtulisse emptionem alterius domus juxta collegium dominorum juristarum exercitiis duarum mediarum facultatum multo commodioris eamque pro consistorio cancellaria medicorum auditorio pedelli habitatione atque carceribus accommodare velle. Facultas respondit si P. Lammormain domum ad albam rosam una cum intermedia quondam pedelli juristarum domuncula ad formam ab universitate sibi praescriptam actualiter emptam persolverit et persolutam postmodum dictis usibus accommodaverit tunc demum modernam universitatis domum ei tradi posse. Sed solis promissis aequivoco interpretari aptis nihil prorsus esse deferendum. Ast ubi per commissarios cum praedicto P. Lammormain tractari coeptum nunquam se tale quidpiam cogitasse vel proposuisse imo sibi scholam juristarum tradi postulasse asseruit pro qua eam quae modernae universitatis domui vicina est ad majorem animorum et scholarum conjunctionem se emere velle respondit. Ex his ulterior tractatio in nihilum obiit et fumum.

Conquesti sunt nuper promoti baccalaurei se ratione disputationis et adepti gradus per pedellum duplici exactione gravari. Conclusit facultas ut pedello medium tantum florenum et nihil amplius dependat in consequendo doctoratu primum pro bonis novis imperialem similiter pro ipsa invitationis et promotionis solennitate florenum cum dimidio solvat semper tamen salvo notorie pauperum privilegio. De caetero disputaturus pro alterutro gradu theses suas ipsemet doctoribus de facultate reverenter offerat et praesentet.

Cum ab examinatis doctoribus pharmacopoeis chirurgis per decanum modo plus modo minus ad facultatis aerarium sit receptum vel relatum balneatores etiam detorioris conditionis esse vel minoris aestimari nolint pharmacopoei vero pro examine provisoris G flor. pro semetipsis officinarum dominis 12 flor. aerario lubentes persolvunt statuit admonita facultas imposterum a balneatoribus et chirurgis Viennae habitantibus pariter 12 flor. exigendos esse. Chirurgum tamen nosocomii civilis et reliquos pharmacopoeos chirurgos atque balneatores aliunde huc ad examen venientes dimidia pensione 6 nimirum flor. depositione dimittendos esse.

Quinque supradicti med. baccalaurei adjectis etiam thesibus de methodo medendi conceptis petierunt thesium approbationem atque easdem publice pro gradu

licentiae consequendo [fol. 159r] disputandi facultatem. Conclusit facultas theses oblatas revidendas et approbandas approbatas et impressas publice disputandas esse.