[20. Mai 1643] Die 20. Mai Mag. Liborius Fleitman Paderbornensis, Mag. Franciscus Ganser Passaviensis, Mag. Adamus Kirchweger Viennensis, qui rigoroso se examini subjecerant fuerant admissi et prima laurea insigniti. Eodem die D. Joannes Maria Tronus medicus ex aula privilegiatus humiliter petiit ut facultas illi propter summam egestatem subveniret aliquot nummis. Consensit facultas ut duos illi ducatos ex aerario mitterem.

Supplicavit Maria Tillin vidua et domina pharmaceuticae officinae ad nigrum elephantem simulque proposuit Jeremiam Österreicher apothecarium Strölae, Misniae ad Albim oriundum quatenus illum ut provisorem idoneum examinaremus. Examinatus est 20. Aprilis a doctoribus Colmanno, Magiro, Wechtler, Drogenio, Greisl et duobus senioribus collegi pharmaceutici Balthasaro Pratez et Ludovico Gebhart et approbatus.

Circa hoc tempus fuerant omnes obstetrices quae civili jurisdictioni subjectae ad curiam citatae ubi illis serio injunctum ut sese examini facultatis subjicerent. Respondit D. Franciscus Mensuratus ad decretum circa rationes acceptarum pecuniarum transmissum se velle singulis annis in festo sanctorum Cosmae et Damiani solvere 5 flor. et hoc in perpetuum. Hac tamen nuda promissione facultas minime contenta sed statuit ut 50 flor. statim solveret quod quidem stipulata manu promisit sed necdum praestitit.