[1. Juli 1645] III. congregatio 1. Julii. Lectum est regiminis decretum ut loco D. Mayer alius denominetur magister sanitatis una cum instructione pro eodem chirurgo infectorum inspectore mortuorum et vespillonibus. Conclusit facultas respondendum esse D. Mayer superiori anno tanquam virum doctum et ad hoc munus sufficienter a nobis propositum et a regimine pro perpetuo medico pestis susceptum elapso dimidii anni spatio et peste non amplius grassante praeter omnium nostrum spem et ipsius demeritum ab officio dimissum. Stipendium esse perexiguum et illud incertae solutionis. Jam peste denuo reversa nullum reperiri doctorem qui metu similis exauctorationis se suosque tanto periculo exponere velit. Quapropter expedire communi saluti ut praefatus D. Mayer ad hoc officium postliminio reassumatur eique stipendium condignum et certo solvendum assignetur.

Qui cum doctor sit, eo ipso satis instructus esse dignoscitur; chirurgos et inspectores nobis transmissos examinare velle de quorum sufficientia vel ineptitudine relaturi essemus jam una hora neminem eam artem edoceri posse. Vespillones et infectarum aedium observatores cum medicis nihil habere commune [fol. 211r] sed a magistratu puro politico in suo munere instruendos esse.

Cum domina Maria Tiloin provisorem dimisisset nec alium facultati praesentasset conclusum est eam per decreto serio admonendam ut hominem artis peritum et catholicum facultati sisteret pro provisore examinandum quod factum. Gavisus fuerat hactenus Emericano stipendio Joannes Möglin med. bacc. qui cum in Italiam abiisset pro eodem supplicavit Petrus Leonhartus de Moquentin med. stud. Consensit facultas.

Elisabeth Haydin obstetrix praesentavit mihi Mariam Kräpflin Augustanam quam in discipulam suscepisset rogans cum scribendi perita sit et catholica ejus nomen in acta referrem ut absoluto tyrocinio certo annorum numero per facultatem determinando etiam ad examen praesentari posset.