[17. September 1646] V. congregatio XVII. Septembris. Doctores Wacker Nimbsdorff et Mayr conquerebantur se in sessione et voto postponi D. Mittelbachio. Hoc proedriae sive procedentiae praejudicium ab omnibus ultro citroque variis rationibus consideratum tandem ita decisum est doctorem hic promotum statim aptum esse ad facultatis consessum licet actualis consiliorum participatio ex novo statuto ipsi demum post biennium approbationis die elapsum ipsi concedatur. Proinde si quis alibi promotus doctor post bona nova per examen hic admissus vel etiam intra hoc biennium repetat ad facultatem et consilia admittitur nihil tamen praejudicii adferre posse jam per bona nova approbatis vel cum promotis cum post admissionis publicationem etiam veteri statuto aliunde advenientibus (nisi ultra 6 menses differant promotionem) praeoccupent [fol. 219r] sessionis locum. D. Mittelbach amice monendum ut initio nominatis loci competitoribus imposterum cedat quod etiam ultro se facturum fuisse dixit et

concessit.

Conclusum est ut in proxima Fezerianae theriacae dispensatione loco opobalsami

balsamum de Peru optimae notae et oleum rosmarini non tamen cum terebinthina

sed per se destillatum in aequali dosi substituendum.

Praestantius tamen fore si verum Arabiae opobalsamum cum ejusdem ligno et

fructu posset haberi.

Regimen quaerebat an petechiae nigrae hoc tempore grassantes pro signis pestis

habendae et inde mortuorum nomina in schedis cum cruce signanda atque domus

occludendae sint. Responsurn distinguendum esse inter nigra et alia febrium

malignorum sporadice et ex privata causa grassantium exanthemata et inter pestis

maculas mox a principio morbi vel mox post mortem apparentes. Illas enim

contagiosas non esse praesertim si pestis inguinaria vel cum anthracibus non

grassetur. Si vero pestis publica plures domos in civitate et quidem plures homines

in una domo corripiat et inter hos unus cum bubone alter cum anthrace tertius

statim primo vel secundo die cum summa virium dejectione vel in aegri citra

bubonem aut anthracem defuncti cadavere nigrae eaque latiores maculae

conspiciantur talem in scheda mortuorum cruce signandum vel vivum in

lazarethum omittendum et habitationem omnemque infecti hominis suppellectilem

occludendam et a sanorum consortio reliquos inhabitatores esse separandos.

Inspectores infectorum hac de re jam saepius admonitos nulam tamen observare

differentiam et saepe simpliciter febricitantes ad loimocomium ablegare.

loannes Baptista Turcha veterator Neapolitanus jam semel a magisterio sanitatis

judicio et voto facultatis velut ignotus et ignarus agyrta rejectus tunc decreto

comitis Henrici Guilielmi de Stahrenberg aulae praetoris125 remittitur ad facultatem

ut juxta caesaris intentionem examinaretur idque quantocyus fieret ac desuper

informatio ipsi remitteretur. Sed cum inscius linguae germanicae traderet decreto

praetoris aulici se jam ad magisterium sanitatis admissum et saltem de quantitate

salarii anticipato numerandi certior fieri desideraret nihil vero de examine

subeundo vellet audire nec sua secreta dicere se communicaturum perjuraret cum

increpatione dimissus nec amplius est regressus.

Joannes Gasparus Zolner authonticum legitimae nativitatis instrumentum exhibuit

et ad examen pro doctoratus gradu admissus est.

Georgius Achazius comes a Losenstein provincialium [fol. 219v] praeses et

praetor126 per literas mutui compassus ut vocant requisivit facultatem ut aliquot de

suo gremio doctorum una mecum mitteret ad Joannem Ludovicum de Mäming ob

emotae mentis furiam ut uxor asserebat in turri Pailina detentum qui de ipsius

morbo et futura cura judicium ferrent.

Adjuncti sunt mihi D. Wechtler et D. Drogenius qui una mecum dictum de Mäming

visitarunt sed nihil delirii in illo aut plumbi laminam intra cranium capitis per

magicam superstitionem inclausam potuimus animadvertere.

Georgius Peringer hactenus per annos 15 balneator Crembsensis cum viduam

balnei in Rhörbadt duxisset petiit examinari. Examinatus est 18. Septembris.