[21. August 1647] 21. Augusti congregatio. Deliberatum fuit de supplici libello baptizati Judaei Guilielmi Fortunati Frey qui a regimine remunerationem petiit ob expensas et damnum perceptum ex non acquisito sanitatis magisterio quod pie defunctus D. Strasser ipsi certo promisit petiit etiam liberam sibi concedi praxin. Responsum nisi regimen supplicanti ex commiseratione aliquam gratiam exhibere cogitet de jure non teneri eo quod facultas eundem in examine inhabilem et idiotam repererit ad hoc munus peragendum [fol. 226v] quod ad alterum facultatem sperare regimen privilegia nostra defensurum.

Supplicarunt Sebastianus Tadaeus, Claus Petrus Moquentin, Joannes Wenceslaus Mayr, Christophorus Plöchinger sibi assignari materiam pro gradu doctoratus. Annuit facultas petitioni unius Claus excepta eo quod non haberet annos neque studii neque aetatis.

Accusatus fuit pharmacopola Crembsensis Morell ab ibidem practicante D. Gammaeo eo quod liberam Crembsi exerceret praxin neque se doctoribus quoad visitationem pharmacopoli subjicere vellet. Conclusit facultas ut eidem per decretum praxis inhibeatur et visitationem pharmacopolii pro more admitteret quod executioni mandatum fuit.