[1. April 1651] 1. Aprilis Cajus Bauman asseruit se die cinerum fractam agricolae

tibiam debito modo emplastris et fasciis convenientibus obligatam

conferruminasse.

Post paucos dies se absente Fridericum Hehnner chirurgum vincula dissolvisse

atque inde aegrum os tibiae distorsisse. Sibi tamen culpam non bene compositi

ossis imputari. Petiit ut facultas attestatione scripta illi succurreret os tibiae fractum

ab se recte decenterque conjunxisse Friedericum vero Hehnner quod falcem suam

in alienam messem immiserit mulctari et ad satisfactionem pro impensis laboribus

et medicamentis condemnari.

Respondit Hehnner se ab ipso Cajo in curationis auxilium fuisse vocatum se

vinculum nullum solvisse nisi postquam aeger a Cujo desertus et ipsi Hehnnero

curandus ultro fuit traditus et relictus: proinde se ab intentata querela absolvi

postulabat. Cum Cajus Bauman contra Fridericum Hehnner asserta probare non

posset ac sibimetipsi contradiceret etiam bene factae conjunctionis attestationem

sine praevio aegri examine habere non potuit.

Eodem die provisor pharmacopolii in nosocomio civili contra socium suum

conquerebatur quod eum furti reum in compedes conjiciendum palam et in faciem

dixisset multa in compositionibus faciendis ingredientia penitus omisisset ideo ad

palinodiam et mulctam condemnari rogabat. Quae omnia cum reus fateretur a se

prolata et provisorem hoc modo e conditione exturbare et in ejus locum sese intrudere conaretur ut datis invicem dextris amicitiam redintegrarent et neuter alterum calumniaretur injunctum fuit. Et nisi ab ejusmodi furtorum insimulationibus abstinerent senatui denuntiandos ut velut sacrilegi nosocomi defraudatores punirentur. Quibus auditis conticuerunt et in amicitiam datis dextris redierunt etiam conditione privati.