[26. August 1651] III. congregatio 26. Augusti. Collegium chirurgorum supplicavit ut secundum statutorum facultatis articulum in examine duo illoram post factam examinandi praesentationem assiderent et non minus ipsis quam pharmacopoeis praesentatum examinare liceret. Conclusit facultas majorum acta esse relegenda et prius dispiciendum an ex antiquis facultatis actis constaret hujusmodi examini chirurgos interfuisse et praesentatos examinasse. Quod si hujus actus possessionem vel usum nunquam habuissent etiam imposterum hoc illis absolute denegandum.

Philippus Haller per aliquot annos nosocomii civilis similiter ad S. Marcum chirurgus demonstravit se ab haereditario possessore balneum cancellariae conduxisse demisse rogans ut facultas se dicti balnei magistrum agnosceret vel si prioribus artis approbationibus nollet esse contenta in eum finem sibi pro tertio examine diem assignaret. Conclusum illum praeter necessitatem bis examinatum ulterius non esse examinandum.

Duo pharm. stud. qui aliquandiu in officina nigri elephanti serviverant [fol. 245v] contra hujus pharmacopoli dominam conquerebantur quod ipsis promissum et consuetum salarium denegaret. Respondit illa literarum ignara se pro annuo salario nulli unquam plus quam 50 flor. persolvisse quod libello suo se demonstrare posse asserebat. Et quamvis ex libello constaret ipsam 60 flor. pro anni salario solvisse nihilominus visum est reliquorum pharmacopolarum informationem habere qui responderunt se non tantum ab illa 60 flor. accepisse sed etiam suis famulis hactenus tantundem dedisse nec minori stipendio aliquem conducero posse.

Michael Creuzenthaller Graecensis chir. stud. empta Nicolai Wernicken tonstrina supplicavit examinari sed adeo inepte respondit ut examinatores judicarent illum ad magisterium admitti nullatenus posse. Cum post aliquot dies se reprobatum audivisset pro secundo examine supplicavit quod 28. Augusti subit et omni timere deposito etiam in gravissimis quaestionibus satisfecit. Serio tamen admonitus ut operationibus chirurgicis in hospitali semper adesset dein bonos authores diligenter legeret vulnera, fracturas, luxationes et alios graviores casus solus aggredi vel curare sibi non praesumeret sed vel experti magistri aut medici auxilio uteretur quod se facturum promisit.

Ad nundinas pentecostales venit mulier quaedam Hollanda medicastra vel saga potius quae in publico foro totius medicinae scientiam sibi infusam declamabat. Et cum insanabilium praesertim morborum praesertim sterilitatis curam promitteret mox curiosae magnatum civiumque uxores ad illam aureos et urinam mittere et remedium catervatim petere eo peracta praeterea inspectione urinarum plane prophetisa agebat ut etiam episcopum in sui admirationem traheret et pleraeque illustres foeminae apud imperatorem pro privilegio ipsi dando instarent. Vix ac ne vix quidem efficere potui ut hoc vigore privilegiorum pontificiorum foeminae haereticae denegaretur. Postquam vero intellexi hanc sagam Linzii plurimos decepisse Vratislaviae quoque nefandas artes exercuisse ideoque virgidemiam vix effugisse collectis ejus mendaciis et in contrarium testimoniis regimini indignitatem facinorum denominavi et ut juxta caesareas resolutiones eam urbe Viennensi exesse juberent postulavi. Placuit regimini qua ratione prophetias et jam pridem praeterita corporis mala et inspecta solum urina dijudicare posset simul etiam ad objecta sibi futura responsum esset? coram audire. Citata igitur mox fuga sibi consuluit meque ultoriori actione liberavit.