[28. Juni 1685] IV. congregatio 28. Junii. Legit D. Festa acta sua, quae approbata sunt. Cum ergo in antiquioribus nostris statutis jam saepius reperiatur, ut quando publica celebratur congregatio, ad quam omnia membra citantur, absentes in poenam non contradicendi sint contemnati, utique haec acta rata et approbata manebunt.

Iterum importune Lincenses suam solutionem urgent, comminando quod velint alias nos accusare. Conclusum, ut respondeatur, si non velint nostro concluso acquiescere, esto libitum, ut nos accusent. Sed nihil hactenus urserunt.

Proposui, cum pharmacopoei saepius adhortati et per decretum moniti, ut dum venditionibus pharmacopoearum intersunt, valorem et pretium medicamentorum taxant, id authoritate propria facere non praesumant sed praesente uno et altero dom. doctore quemadmodum hactenus laudabiliter observatum fuit, id faciant.

Cum ergo benignioribus adhortationibus refractarii id facere detrectent et ultro pharmacopoeam ad aureum cervum et ad auream coronam soli et sine praesentia nostrum visitaverint et taxaverint, hinc apud regimen, ad quod negotium hoc jam ante annum devolutum fuit, accusari debent.