[24. Jänner 1689] II. congregatio 24. Januarii. Primum nobis negotium fuit cum taxa medicamentorum pro pharmacopoeis et quidem ipsis etiam probantibus composita a facultate, deinde ab invidis quibusdam et ignorantibus mutata et cum plurimis et absurdissimis erroribus praelo commista, quaeque ad alias provincias delata non poterat in notam et dedecus facultatis Viennensis non cedere. Conclusum itaque abeundem mihi esse dom. Comitem Jörger11 tamquam regiminis praesidem et caesaris locum tenentem monstratisque tot impressae taxae erroribus rogandum, quatenus eam taxam facultatis censurae iterum subjicere et correctam de novo imprimi jubeat et permittat, quod facile consensit dom. com. Jörger.

D. Georgius Wagenhofer Bononiae in Italia promotus aphor. sibi pro repetitione assignari rogavit. Obtigit ipsi aphor. 24 sect. I.

Supplicarunt dom. Daniel Schrader et Joannes Hartmannus Schwer, aulici chirurgi privilegiati contra Joannem Michaelem Lauter civem Viennensem, qui in fractura tibiae a praedictis curatus, solutionem promissam ideo ipsis negabat quod dislocata ossa ab ipsis debito modo non essent reposita, quod quidem ipsa etiam figura tibiae incurvata et ad ambulandum debilis aperte docuit. Contra affirmantes chirurgi ossa haec fracta debito modo a se reposita esse, post factam repositionem per inordinatos patientis motus iterum dislocata, novam affecti pedis inspectionem per quosdam doctores et chirurgos sibi permitti et institui rogarunt, cui petitioni facultas consensit.