[12. Mai 1692] 12. Maii Anna Wadlin Cellensis ratione sui infanticidii masculi in molendina Wellerstorffensi ante 18 annos perpetrati spontanee se ipsam in tribunali caesareo denuntiat atque in arrestum ponit, mori desiderans, quare cum ex defectu corporis delicti a solo audita non sat judicanda an non potitus ob interventa phantasmata tristia et visiones nocturnas melancholica censenda?

Dicasterium Viennense nos humaniter conquirit ad decidendum casum. Convocatis ergo D. Plöckner, Stumpff, Kielman Festa, Gallermair, Pfann et von der Haiden atque adducta delinquente per subjudicem ad aedes meas eademque rite examinata 18. Junii a me remissum datum: Rebus sic stantibus arrestatam nequaquam melancholico-hypochondriacam repertam (confessam quidem folliculum umbilicalem infanti disripuisse haud ex intentione occidendi et ex pulvinaris desuper impositione ejusdem suffocationem subsecutam unde in vacuum suillum stabulum infantem collocaverit) sed partim ex idaeis ebrietatis partim ex pusillanimitate animi ob occisum infantem non baptizatum ex desperatione ac taedo vitae plurima edixisse adeoque melancholicam per accidens judicatam fuisse. Votis ergo nostris praetorium et magistratus Viennensis insistens facta castigatione in domo disciplinae ream dimisere.