[20. Juli 1697] V. congregatio 20. Julii. Carolus Joachimus Festa, Franciscus Passerini, Joannes Josephus Danckl, .Joannes Georgius Josephus Scholz et Paulus Josephus Plöckner suas disputationes pro doctoratu subiverunt, cum consensu facultatis 23. Julii dom. cancellario praesentabuntur.

Lectus fuit libellus supplex D. Joannis Antonii Deimbl provincialis physici in Stockerau ejusque pharmacopoei Christophori Engl, qui ambo empyricum nomine Coelestinum civitatis Corneuburgensis incolam accusarunt. Conclusit facultas, ut empyricus Viennam citetur eique omnis praxis sub multa interdicatur, praefato autem medico respondeatur, ut siquidem facultatis auxilio frui et defendi desiderat, ipse prior statutis facultatis satisfaciat seque ad publicam repetitionem accingat, ad quam jure facultatis teneatur.

Supplicat pro sessione D. Joannes Michael Surgant, siquidem quatriduo ante repetitionem peregit. Jussus est expectare congregationem pleniorem.

Decretum ab aula ad regimen et ab hoc ad consistorium missum lectum fuit, in causa alicujus medici Philippi Christophori Tilmez, qui insalutata facultate in Ybbs practicavit et saepius citatus nunquam comparuit. [fol. 139r] E contra ad aulam suum habens refugium per varios suos patronos licentiam libere practicandi in contemptum nostrorum privilegiorum obtinuit.