[4. November 1680] Die 4. Novembris dom. Georgius Joannes Krockier Lusatus Laubanus chir. mag. civilis et suae majestatis personae chirurgus pro doctorali laurea examinatus est.

Deposuit unicuique 6 flor. Intimavi illi, quod in scrutinio medico sit judicatus pro sufficienti et sit dignus, ut coronetur laurea doctorali in chirurgia. Hinc statim aperiebatur porta et decanus incepit praefari oratiunculam in laudem chirurgiae et ipsius candidati. Finita hac debuit deponere juramentum sed cum clausula, ut det reversales, quod se in curas medicas et intemorum morborum non velit immiscere, ubi adest copia doctoris medici, secus si non adesset medicus aut tam cito non possit vocari, tunc necessitate coactus oporteret nihilominus succurrere aegrotanti. Deposito igitur juramento creavi illum in doctorem authoritate pontificia et caesarea in nomine patris et filii et spiritus sancti Amen. Deinde tribui illi insignia doctoralia, id est primo pileum, deinde annulum, tertio dedi illi osculum pacis et quarto benedixi illi et optavi omnem felicitatem. [fol. 22v] Ingressus est in conclave togatus sed sine biretro, ut esset distinctio inter bacc. med. et chirurgiae doctorem. Dedit chirothecas, item lautum convivium. Aderant etiam duo tubicines, qui dederunt sonum, quando illum creavi et quando supra illum feci crucem.

Concluserat etiam facultas, ut daret aliquam probam suae doctrinae, nempe ut in praesentia alterius chirurgiae doctoris faceret fasciationem, verum ob itinera cum sua majestate hoc necdum praestitit sicut et reversales necdum dedit. [fol. 23r]

Accepta: A dom. exdecano 150 flor. 15 cruc., anno 1679 1 flor. 30 cruc., anno 1680 141 flor. 45 cruc. Summa: 293 flor. 30 cruc. [fol. 23v]

Exposita: Pro saccharatis 40 flor., musicis 13 flor., pedello 9 flor., eidem in festo patronorum 6 flor. 31 cruc., clero 1 flor. 30 cruc., pro variis memorialibus ad regimen et mareschallum aulicum ratione agyrtarum et aliis rebus perficiendis 2 flor. 23 cruc., sacristano ad S. Stephanum 45 cruc. Summa: 73 flor. 15 cruc. Remanent: 220 flor. 15 cruc.

Fridericus Ferdinandus Illmer phil. et med. dr. et institutionum professor m. p. [fol. 24r]

[1680/ 1681]

Acta decanatus V. Francisci Ganser phil. et med. dr., electi 4. Decembris 1680 sub rectoratu domini D. Wolfgangi Plöckner.