Universis sancte matris ecclesie filiis ad quos presentes littere pervenerint. Nos miseratione divina. Guillelmus Antibarensis archiepiscopus. Almannus Suanensis. Antonius Sagonensis. Jordanus Bobiensis. Melletius Gallipolitanensis. Bonifatius Sulcitanensis. Johannes Serbiensis. Jacobus Castrensis. Jordanus Acernensis. Et Salmannus Wormaciensis episcopi salutem in domino sempiternam. Pia mater ecclesia de animarum salute sollicita devocionem fidelium per quedam munera spiritualia remissiones videlicet et indulgencias invitare consuevit ad debitum famulatus honorem deo et sacris edibus impendendum, ut quanto crebrius et devocius illic confluit populus christianus assiduis salvatoris gratiam precibus implorando, tanto delictorum suorum veniam et gloriam regni celestis consequi mereatur eternam. C(upientes igitu)r ut altare beate Marie virginis in cripta Ecclesie Gurcensis congruis honoribus frequentetur et a Christi fidelibus iugiter veneretur Omnibus vere penitentibus et confessis qui dictum altare in quatuor festis Beate Marie predicte videlicet assumptionis et nativitatis purificationis et annunciationis in festivitatibus quoque natalis domini Circumcisionis Epiphanie Pasche Pentecostes Corporis Christi sanctorum Johannis Baptiste et evangeliste. Petri et Pauli apostolorum et omnium aliorum sanctorum omnibusque diebus sabbati dum missam celebratur ibidem. Et per octavas predictarum festivitatum. causa devotionis orationis aut peregrinationis accesserint. Et qui ad fabricam luminaria ornamenta aut quevis alia dicti altaris necessaria manus porrexerint adiutrices. Et qui in eorum testamentis aut extra aurum argentum vestimentum aut aliquod aliud caritativum subsidium dicto altari donaverint legaverint aut donari vel legari procuraverint. Quocienscumque quandocumque et ubicumque premissa vel aliquid premissorum devote fecerint de omnipotentis dei misericordia et beatorum Petri et Pauli apostolorum eius auctoritate confisi singuli nostrum quadraginta dies indulgenciarum de iniunctis eis penitenciis misericorditer in domino relaxamus Dummodo dyocesani voluntas ad id accesserit et consensus. In cuius rei testimonium presentes (litteras) sigillorum nostrorum iussimus appensione muniri. Datum Avinioni prima die mensis Maii, anno domini Millesimo CCC° XXXI° Et pontificatus domini Johannis pape XII anno quintodecimo.

Source Fulltext: Peter Peusquens