Nicolaus episcopus seruus seruorum dei. Uniuersis Christi fidelibus per Salzeburgensem prouinciam constitutis Salutem et apostolicam benedictionem. Quoniam ut ait apostolus omnes stabimus ante tribunal Christi recepturi prout in corpore gessimus, siue bonum fuerit siue malum, oportet nos diem messionis extreme misericordie operibus preuenire ac eternorum intuitu seminare in terris, quod reddente domino cum multiplicato fructu recolligere debeamus in celis, firmam spem, fiduciamque tenentes, quoniam qui parce seminat, parce et metet et qui seminat in benedictionibus, de benedictionibus et metet uitam eternam. Cum igitur Venerabilis frater noster.. Archiepiscopus Salzeburgensis, sicut ex parte ipsius fuit propositum coram nobis, ecclesiam Salzeburgensem iamdiu inceptam consumare proponat opere sumptuoso, ad quod fidelium subsidium esse dinoscitur plurimum oportunum, Vniuersitatem uestram rogamus, monemus, et hortamur in domino, in remissionem uobis peccaminum iniungentes, quatinus de bonis uobis a deo collatis pias elemosinas, et grata caritatis subsidia erogetis, ut per subuentionem uestram opus inceptum ualeat consumari, et uos per hec et alia bona que domino inspirante feceritis, ad eterne possitis felicitatis gaudia peruenire. Nos enim de omnipotentis dei misericordia et beatorum Petri et Pauli apostolorum eius auctoritate confisi omnibus uere penitentibus et confessis qui ei ad hoc manum porrexerint adiutricem Vnum Annum et Quadraginta dies de iniunctis sibi penitentiis misericorditer relaxamus. Presentibus post Quinquennium minime ualituris. Quas mitti per Questrarios districtius inhibemus, eas, si secus actum fuerit, carere uiribus decernentes. Datum apud Vrbemueterem v. Idus Aprilis Pontificatus nostri Anno Quarto.||
Sig. plumb. Nicolai PP. IIII.

Source Fulltext: DOPPLER