Wier Albrecht von gots gnaden Herczog ze Oesterreich ze Steyr ze Kernden vnd ze Krayn Graf ze Tyrol etc. Tuen kunt vmb die Gueter gelegen ze Mollen in vnser Herschaft ze Steyr, die Symons des Venken seligen erben ze lehen von vns gehabt habent vnd die vormals gewesen sind Niclas des Hayden, die auch der egenant Symon der Venk durch seiner sel hail geschaffet vnd gegeben hat dem kloster vnd Gotshaws ze Gersten, daz wir lautterlich durch Got vnd durch vleizziger pet willen des egenanten Venkn nechsten freunt die aygenschaft der vorigen Gueter gegeben haben vnd geben auch den erbern geistlichen vnsern lieben andechtigen .. dem Abt vnd dem Conuent desselben klosters ze Gersten also, daz si die fuerbas ewiklich habn vnd niezzen sullen vnd allen irn frumen damit schaffen vnd tun, als mit andern iren aygenlichen Guetern die si habent an alle irrung vnd hindernisse. Mit vrkund ditz brifs Geben ze Wienn an Suntag nach sand Dyonisii tag Nach kristes begurt dreutzehenhundert iar vnd dasnach in dem zwai vnd sibntzgisten Jare. Magister curie de Liech(tenstein) per Hainr(icum) notarium suum.