Wie Albrecht von Gots gnaden Herczog ze Osterreich vnd ze Steyr Veriechen vnd tun chunt offenleich mit disem brief, Daz wir tugentleich vnd genedichleich ze rechtem vreyn Lechen verlichen haben vnsern Getrewn Ruegern vnd Niclan den Haiden vnd allen iren Eriben den Hoff ze Moln vnd den Maricht mit allen Hofstetten vnd da zu gehort vnd di Hueb pei der Chirchn vnd daz Guet am Hoerlant vnd di Haide von dem Maricht vncz in di Steyrnich vber all vncz in di Steyr an Steyrer wisen vnd di Hopfgangwis mit alle vnd da zue gehort besucht vnd vnbesuecht wi so daz genant ist. Also daz chainer vnserPurgrauen ze Steyr noch amptlewt noch vorster dar auf nichtsnicht ze schaffen noch ze richten haben noch gewinnen schullen, weder wenig noch vil, vmb dhainerlay sache, ez sei auf dem Maricht inner Hous oder auzzer Hous, Ez sein Vechtwandel oder vnzuecht oder welherlai daz sei, daz darauf geschicht, daz sol alles in daz vorgenant Hous ze Hoff gepezzert vnd verwandelt werden also Lantsrecht ist. Wenn waz an den Tode get, daz sol vnser Purgraf pezzern vnd sol man in den antwurten als er mit Gurtel vmuangen ist in an schaden. Si schullen sich auch ze den vorgenanten Guetern allen verwitten(?) mit zimmerholtz, zarenholtz vnd brenholz in allen vnsern voersten in dem Molntal an alle forstrecht vnd an alle irrung. Wir wellen auch, wer in der wandel wider wolt sein, daz di vnser purgraf darvmb note(?) so lang vntz sie sich mit in vrichten(?). Wir haben in auch verlichen vischer zu haben in der Steyr vnd in der Steirnich vnd in der Palten ze den vorgenanten Hous zu Hoff an alle irrung, als weit di egenant pharr ist. Wer auch an den vorgenanten Hous zu Hoff ist oder dar in geflochen chumt, der sol freyung haben pei vnsern Hulden. wurd daz indert vber varen von wem daz wer der schol darvmb von vns vnd vnsern Purgrauen an hab vnd an Guet swerlich gepezzert werden, wand si vns der rechten beweiset hahabent(!) mit iren alten briefen, di si von vnsern vordern dar vber gehabt habent, di wir gesechen vnd gelesen haben, vnd sein auch der oftgenanten Gueter aller vnd waz dar zue gehort mit allen rechten vnd nutzen als vorgeschriben ist, ir Hern vnd Gewern fur allen Gewalt vnd vnrecht, wo in dez noet vnd durft geschieht, wand si allem iren frum damit schaffen schullen, verseczen verchauffen so iz in aller pest fuegt. Wir gepieten auch ernstleich vnd wellen, Daz all vnser Purgraun oder wer Steyr inne hat, di egenanten Ruegern vnd Nycolan di Haiden vnd ir Eriben schirmen vnd vrein(?) ze alle dem rechten, als vorhie geschriben stet. Darvber ze einer vrchunt vnd ewiger sicherhait geben Wir disen offen brif besigelt mit vnsern Anhangendem Insigel. Der geben ist ze Wienn Nach Christes gepurd Tousent drew hundert jar darnach in dem sechs vnd dreiczkisten Jar an sand Larencen tag.

magister curie