++ Innocentius episcopus servus servorum dei venerabili fratri Eberhardo Salzburgensi archiepiscopo eiusque successoribus canonice substituendis in perpetuum. ++ Pastoralis officii consideratione inducimur, fratribus et coepiscopis nostris suffragium apostolice sedis impendere et eorum dignitates et iura propensiori studio conservare, ne malignitate quorumlibet ecclesiis, que sunt eorum gubernationi commisse, gravamen immineat, si eis apostolicum defuerit munimentum. Attendentes itaque, quantum favoris et gratie tu, frater archiepiscope, pro devotionis affectu apud Romanam ecclesiam promerueris, et quam devotam ecclesia tibi commissa se Romanis pontificibus exhibuerit, nichilominus cogitantes preter commune debitum te et ecclesiam tuam quadam prerogativa dilectionis amplectimur et vobis nostrum tam libenter quam benigne patrocinium impertimur. Eapropter tuis iustis postulationibus clementer annuimus et felicis memorie ++ Alexandri ++ secundi et ++ Alexandri ++ tertii et ++ Lucii ++ Romanorum pontificum vestigiis inherentes Salzburgensem ecclesiam, cui Deo auctore preesse dinosceris, sub beati Petri et nostra protectione suscipimus et presentis scripti privilegio communimus, statuentes, ut quascumque possessiones, quecumque bona eadem ecclesia impresentiarum iuste et canonice possidet aut in futurum concessione pontificum, largitione regum vel principum, oblatione fidelium seu aliis iustis modis prestante domino poterit adipisci, firma tibi tuisque successoribus et illibata permaneant. Ad hec cum inter antecessorem tuum Conradum archiepiscopum et. canonicos et ministeriales Gurcensis ecclesie super electione pontificis, quam idem Gurcen(ses) tam communi iure quam privilegio pie memorie ++ Lucii ++ secundi predecessoris nostri, quod se fatebantur habere et longa consuetudine sibi liberam vendicabant, ex delegatione supradicti Alexandri tertii predecessoris nostri coram Alberto quondam Frisingensi episcopo et Heinrico olim abbate sancte Crucis, sicut prefato predecessori nostro Lucio tertio ex litteris eorum innotuit, questio diutius agitata fuisset, tandem ipsi, receptis testibus et rationibus plenius intellectis et inspectis Salzburgensis ecclesie privilegiis, electionem Gurcensis episcopi ad Salzburgensem archiepiscopum tantummodo pertinere per sententiam decreverunt. Idem vero predecessor noster Lucius Privilegium, quod ecclesie tue predecessor noster Alexander secundus indulserat, diligenter attendens et cognoscens ex tenore ipsius, quomodo prescriptus episcopatus ad petitionem bone memorie Geboardi predecessoris tui de auctoritate ipsius predecessoris nostri eo modo constitutus fuerit, ut ecclesie tue nullo umquam tempore debeat subtrahi, nec aliquis episcopus sive per investituram, ut dici assolet, sive quocumque pacto ibi constitui, nisi quem Salzburgenses archiepiscopi voluntate propria eligere et consecrare decreverunt, constitutionem eiusdem predecessoris nostri Alexandri secundi confirmatam privilegio antecessoris nostri Alexandri tertii, et sententiam prefatorum iudicum confirmavit, quas nos ratas habemus et auctoritate apostolica confirmamus. Statuimus itaque, ut predictus episcopatus in tua semper et successorum tuorum potestate permaneat, ita quidem, ut ipsius episcopatus episcopis decedentibus, sicut in privilegiis antecessorum nostrorum Alexandri secundi et Alexandri tertii Paparum et in sententia predictorum iudicum continetur, personam idoneam ibi in episcopum eligendi et consecrandi tu et successores tui facultatem liberam habeatis, eo non obstante, quod de Romano Gurcensi episcopo ab Alexandro tertio predecessore nostro tempore scismatis noscitur fuisse permissum. Indignum est enim, ut quod studio pietatis apostolica confirmavit auctoritas, in detrimentum ecclesie tue debeat redundare. Crucem quoque ante vos ferendi et in stationibus festivis super naccum equitandi licentiam habeatis. Adicimus preterea, ut si quid in ecclesia tua vel suffraganeorum tuorum evenerit, quod iudicium apostolicum vel apostolici legati presentiam expetat et tanta fuerit necessitas, ut expectari hoc nulla valeat ratione, vice nostra diffinias, ea tamen in hoc et supradictis mensura servata, qua antecessores tuos usos esse per privilegia ecclesie tue recognosces. Porro utendi palleo intra missarum sollempnia in die palmarum, in cena domini, in sabbato magno, in die resurrectionis domini et secunda feria paschali, in die ascensionis, in pentecoste, in festo sancti Iohannis baptiste, in natali sanctorum Petri et Pauli et omnium apostolorum, in assumptione, nativitate, purificatione, annuntiatione beate Marie, in festo sancti Michaelis, in festo omnium sanctorum, in sollempnitatibus sanctorum, quorum corpora in vestra ecclesia requiescunt, in natali domini, in circumcisione, in epiphania, in dedicatione ecclesie, in ordinatione clericorum, in consecratione episcoporum liberam tibi et successoribus tuis concedimus facultatem. Apostolicam quoque vicem tibi tuisque successoribus in tota Norica provincia concedimns, sicut predecessores tui a nostris usque modo firmam antecessoribus habuerunt. Decernimus ergo, ut nulli omnino hominum liceat, prefatam ecclesiam temere perturbare aut eius possessiones auferre, vel ablatas retinere, minuere seu quibuslibet vexationibus fatigare, sed omnia integra conserventur eorum pro quorum gubernatione ac sustentatione concessa sunt usibus omnimodis profutura salva sedis apostolice auctoritate. Si qua igitur in futurum ecclesiastica secularisve persona hanc nostre constitutionis paginam sciens contra eam temere venire temptaverit, secundo tertiove commonita nisi reatum suum digna satisfactione correxerit, potestatis honorisque sui dignitate careat reamque se divino iudicio existere de perpetrata iniquitate cognoscat et a sacratissimo corpore ac sanguine dei et domini redemptoris nostri Iesu Christi aliena fiat atque in extremo examine divine ultioni subiaceat; cunctis autem eidem loco sua iura servantibus sit pax domini nostri Iesu Christi, quatinus et hic fructum bone actionis percipiant et apud districtum iudicem premia eterne pacis inveniant. ++ Amen, amen, amen. ++||
R^a) Ego Innocentius catholice ecclesie episcopus ss. M^b)||
+ Ego^c) Petrus Portuensis et sancte Rufine episcopus ss.||
+ Ego Guido Prenestine ecclesie episcopus ss.||
+ Ego^d) Pandulfus basilice XII apostolorum presbiter cardinalis ss.||
+ Ego Petrus titulo sancte Cecilie presbiter cardinalis ss.||
+ Ego Iord. sancte Puden(tiane) titulo Pastoris presbiter cardinalis ss.||
+ Ego Hugo presbiter cardinalis sancti Martini titulo Equitii ss.||
+ Ego Iohannes titulo sancti Stephani in Celio monte presbiter cardinalis ss.||
+ Ego Cinthus titulo sancti Laurentii in Lucina presb. card. ss.||
+ Ego Soffredus titulo sancte Praxedis presbiter cardinalis ss.||
+ Ego Bernardus sancti Petri ad vincula presbiter cardinalis titulo Eudoxie ss.||
+ Ego Cencius sanctorum Iohannis et Pauli presbiter cardinalis titulo Pamachii ss.||
+ Ego Gregorius titulo sancti Vitalis presbiter cardinalis ss.||
+ Ego Petrus titulo sancti Marcelli presbiter cardinalis ss.||
+ Ego Benedictus titulo sancte Susanne presbiter cardinalis ss.||
+ Ego^e) Gratianus sanctorum Cosme et Damiani diaconus cardinalis ss.||
+ Ego Gerardus sancti Adriani diaconus cardinalis ss.||
+ Ego Gregorius sancte Marie in porticu diaconus cardinalis ss.||
+ Ego Gregorius sancti Georgii ad velum aureum diaconus cardinalis ss.||
+ Ego Gregorius sancti angeli diaconus cardinalis ss.||
+ Ego Hugo sancti Eustachii diaconus cardinalis ss.||
+ Ego Leo sancte Lucie ad septa solis diaconus cardinalis ss.||
+ Ego Matheus sancti Theodori diaconus cardinalis ss.||
+ Ego Iohannes sancte Marie in Cosmedi diaconus cardinalis ss.||
Dat. Lateran. per manum Blasii sancte Romane ecclesie subdiaconi et notarii, III non. februarii, indictione tertia, incarnationis dominice anno M°CC°, pontificatus vero domni ++ Innocentii ++ pape III anno tertio.||
BD.^f)

Source Fulltext: Salzburger Urkundenbuch, III. Band, Urkunden von 1200 bis 1246. Willibald Hauthaler und Franz Martin. S. 4-7.