Innocentius episcopus servus servorum dei venerabilibus fratribus suffraganeis Salseburgensis ecclesie salutem et apostolicam benedictionem. Notum nobis est et vestra fraternitas per experientiam recognoscit, quod Salseburgensis ecclesia que vobis metropolitico iure preminet in eo est rerum et temporum articulo constituta, ut a filiis suis nunc maxime iuvanda sit propensius et fovenda. Sane venerabili fratre nostro. Salseburgensi archiepiscopo apud sedem apostolicam constituto didicimus referente, quod nobilis vir. dux Bouarie et quidam alii propriis vobis nominibus exprimendi ecclesiam ipsam tempore quo vacavit gravibus nimis dampnis et molestiis afflixerunt, ita quod per eorum insolentiam ad valens quatuor milium marcarum noscitur dispendium incurrisse. Volentes igitur indempnitati predicte Salseburgensis ecclesie per vestram sollicitudinem provideri fraternitati vestre per apostolica scripta mandamus, quatinus ad eiusdem archiepiscopi primordia novitatis benignum habentes sincera devotione respectum, quod ab eo super hoc contra nobiles memoratos pro ecclesie sue utilitate provida fuerit deliberatione statutum, teneatis firmiter et servetis, excommunicationis vel interdicti forte sententiam si quam forsan in eos vel terram eorum pro contemptu previa duxerit ratione ferendam usque ad satisfactionem congruam appellatione remota sine refragatione qualibet observantes. Dat. Lateran. IIII kalend. februarii, pontificatus nostri anno tertio. B^a)

Source Fulltext: Salzburger Urkundenbuch, III. Band, Urkunden von 1200 bis 1246. Willibald Hauthaler und Franz Martin. S. 4.