C. + + In nomine sancte et individue trinitatis. Eberhardus dei gratia Salzburgensis archiepiscopus, apostolice sedis legatus, omnibus Christi fidelibus ++ in perpetuum. Misericordes quia misericordiam consequantur secundum evangelium novimus promisisse dominum eum utique sperantes et ab eo, qui sibi impensum confitebitur quicquid in suo nomine pauperibus et necessitatem patientibus in hac temporali vita impenditur, quando cum potestate magna et maiestate seculum iudicatur venerit. Nos igitur spe capessende misericordie in illo magni examinis die bonum cupientes ad omnes operari, maxime autem ad domesticos fidei, dedimus silvam quandam que dicitur Scintelavve cum omni utilitate, que aliqua industria hominum ab hinc et in evum inde provenire poterit, ad hospitale dilectorum fratrum nostrorum sedis nostre canonicorum in stipendium pauperum, qui ibidem consolationis gratia colliguntur. Sunt autem isti termini predicte silve, quam dedimus pretaxato hospitali: a rivo Chenlebach usque in rivum Rotimpach et a Rotempach usque in rivum, qui dicitur Swarza, et inde usque in verticem montis, qui dicitur Grasekke, a vertice Grasekke deorsum usque in amnem, qui vocatur Liutovvespach, et inde usque in Elmenuvve et a valle Elmenuvve usque Schroven et usque ad locum, qui dicitur antiqui Wisintes Gevenge, et usque in Rotimpachstruben. Ne autem ista traditio ad usum pauperum et Stipendium delegata sive assignata ab ulla persona clericali laicalive possit inmutari vel oblivione elabi et ne malicia hominum atque violentia abstrahat vel exvendicare valeat, hanc paginam scribi fecimus, ut omnium innotescat fidelium noticie tam presentis quam futuri temporis, munientes eam sigilli nostri inpressione, trahentes in testimonium ministeriales ecclesie nostre cum reliquis fidelibus subscriptis: Chunradus prepositus de Houen, Marcus, Albero, item Albero capellani nostri, Chunradus castellanus Salzburgensis, Chu/ono de Gu/otrat, Otto de Goldhekke, Marquardus de Perchaim, et Gerhogus frater eius de Salzburch, Rudigerus plebanus de Salzburchoven, Heinricus de Vzelinge, Albero de Scellenberch^a), Perhtoldus de Rastat, Meinhardus filius M(ein)goti, Dietricus et alii quam plures qui viderunt et audierunt. Acta sunt hec anno incarnationis dominice MCCVIIII, indict. XIII, XVI kal. aug., in Castro Werven, presidente Romane ecclesie Innocentio III, anno pontificatus eius XII^mo, regnante Ottone IIII^to; feliciter amen.||
Impetrata per dominum Rudigerum hospitalarium Salzburgensium canonicorum, dat. per manus domini Hermanni Salzburgensis canonici.||
SD.^b)

Source Fulltext: Salzburger Urkundenbuch, III. Band, Urkunden von 1200 bis 1246. Willibald Hauthaler und Franz Martin. S. 127-128.