++ In nomine domini amen. ++ Ego Chunradus dei gratia comes de Wazzerburch universis Christi fidelibus imperpetuum. Karitati vestre presenti scripto notum facimus timorem^a) domini pre oculis habendo adtendentes multa gravamina, que Salzburgensi ecclesie per nos et per nostros sunt illata in eorundem recompensatione et pro anime nostre et uxoris nostre Chunigundis ac progenitorum nostrorum remedio quandam curiam, que dicitur Huluwen, in parrochia Phaephingen sitam cum consensu et voluntate uxoris nostre Chunigundis beato Rv/odberto et conventui deo ibidem pro tempore famulanti cum omnibus suis adtinentiis hominibus pratis^b) pascuis silvis et rebus aliis contulimus, quam comparavimus a filia domini Alberti de Lantchamphen ministerialis nostri, cum renuntiatione omnium illorum, qui aliquid iuris in eadem curia videbantur habere. Verum eandem curiam ad tempus vite nostre a memorata ecclesia precarie recepimus soluturi de ea sepedicte ecclesie singulis annis certum censum videlicet LX denarios Salzburgensis monete. Ceterum si absque herede, quod deus avertat, nos debitum carnis persolvere contingerit, prememorata ecclesia dictam curiam absque omni questione quiete possidebit, alioquin nos vel heres^c) noster eandem curiam pro XL libris Salzburgensis monete liberam redimendi habebimus potestatem. Et quia diversis nogociis^d) prepediti ad dictam ecclesiam personaliter accedere non potuimus, eiusdem curie possessionem domino Ulrico tunc temporis cellerario canonico Salzburgensi fecimus assignari per ipsum transmittentes eam vice nostra beato Rv/odberto debita devotione offerendam. Petivimus etiam una cum uxore nostra Chunig(undi) fraternitatis consortium in ecclesia predicta et recepimus, ut per iuges ipsorum fratrum orationes deum magis propicium habeamus et placatum. Ut autem ista concessio et traditio rata et inconvulsa permaneat, hanc cartam fecimus conscribi et sigilli nostri munimine roborari. Huius concessionis testes sunt: dominus Sewensis abbas, dominus Heinricus Kiemensis prepositus, Otto capellanus prepositi Salzburgensis, magister Heinricus phisicus, Chunradus plebanus Iselvingen^e), dominus Otto de Sundermaeringen, d(ominus) Otto de Friesingen, dominus Ortolfus de Laimingen et filius eius dominus Ortolfus, dominus Siboto de Sconstet et frater eius dominus Gebehardus, dominus Heinricus de Etelingen, dominus Meingotus de Rvte et filius eius Chunradus, dominus Hermannus dapifer, dominus Aribo de Alhartingen, dominus Chunradus iudex^f) Stutheim et frater eius dominus Heinricus, dominus Hartmannus de Chamera, Plancho marschaldus^g) et alii quam plures.||
Acta sunt hec anno domini M°CC°XXX°, indictione.^h)||
S.ⁱ⁾

Source Fulltext: Salzburger Urkundenbuch, III. Band, Urkunden von 1200 bis 1246. Willibald Hauthaler und Franz Martin. S. 381-383.