+ ++ In nomine sancte et individue trinitatis. Eberhardus dei gratia Salzburgensis archiepiscopus, apostolice sedis legatus, in perpetuum. ++ Cum ad decorem domus dei vigilantius proponimus insudare, utilius providemus, si quieti eorum intendimus, quos pro nobis vigiliis et orationibus cernimus excubare. Cum igitur dilectos nostros capitulum Salzburgense superstite adhuc comite Pernhardo de Leubeno/vwe sepius audierimus querelantes super vexationibus ratione advocatie hominibus eorum irrogatis ipso viam universe carnis ingresso¹⁾ cum advocatia prefata fuisset ad manus nostras libere devoluta, ad petitionem capituli memorati, licet a multis et magnis viris pro ipsa infeudanda prece ac precio fuerimus sollicitati, precium tamen remunerationis divine ac quietis ipsorum preferentes nobis ipsam retinuimus ministerialem nostrum Ekkehardum militem de Tanne defensorem ipsis providentes, a quo sive per officiales ipsius adhuc graviter afflicti ad nos pro auferendo iugo gravaminis huius sepius clamitabant. Nos igitur pia consideratione oppressione ipsorum volentes relevare concedimus in perpetuum capitulo prefato, ut possessiones ipsius ecclesie, que absolute ad nos sunt devolute, ab omni subadvocato libere permaneant nec habeant ultra subadvocatum, sed prepositus Salzburgensis de qualibet hu/oba modium avene nobis solvet annuatim et officialis noster vocato officiale capituli semel ad gramen, semel ad fenum, utraque vice cum sex equitaturis in Saldorf placitabit et unum placitum habebit, semel in anno similiter cum sex equitaturis et non amplius in Pettingen et hiis vicibus officialis capituli necessaria ministrabit; sed noster officialis ius aliud in hominibus prefatis non vendicabit, nisi forte pro sanguinis effusione. Adicimus etiam, ut si forte homo ecclesie uxorem ducat ex aliena familia, noster officialis cum officiale capituli tam nostrum ius ratione advocatie quam ius capituli prosequentur. Ut autem homines ecclesie, qui propria domicilia non habent, qui vulgo heistalt dicuntur, ab omni exactione ratione advocatie permaneant immunes, de bonis capituli mansus subscripti ad nos sunt ex antiquo devoluti, licet a nobis vel a predecessoribus nostris sint aliis infeudati, scilicet curia in Pv/otlingen, villa in Swainpach, mansus apud Rv/othiltingen et mansus in Pastloch cum molendino ibidem. Quia vero ampliorem nostre benignitatis munificentia ipsos volumus experiri, ordinamus, ut, si forte possessiones in Chiemgaev, quas tenet palatinus, ad nos devolvantur vel alie infeudate vel obligate de advocatia prelibata, nec nos nec nostri successores ipsas valeant obligare vel infeudare, sed capitulum in eisdem possessionibus cum onere ac iure supradicto plenaria gaudeat libertate. Ne igitur hec nostra concessio vel ordinatio ab aliquo inposterum valeat immutari, presentem inde paginam conscribi et sigillo nostro fecimus communiri.||
Anno ab incarnatione domini M°CC°XXXIII°, indictione VI^a; dat. Salzburge, non. febr.||
S.^a)

Source Fulltext: Salzburger Urkundenbuch, III. Band, Urkunden von 1200 bis 1246. Willibald Hauthaler und Franz Martin. S. 438-439.