+ ++ In nomine sancte et individue trinitatis. Eberhardus dei gratia Salzburgensis archiepiscopus, apostolice sedis legatus, in perpetuum ++ dilecto in Christo fratri Alberto preposito eiusdem ecclesie ac eius in perpetuum successoribus salutem et fraternam in Christo karitatem. Ad decorem domus dei pro receptione denarii diurni vigilantius intendentes ac promotioni ecclesie nostre specialius insudantes salubre futurum non dubitamus, si in quantum potuerimus ipsius exaltationi operam inpenderimus efficacem. Cum igitur divina favente clementia per nostram sollertiam obtinuerimus, te Albertum dilectum in Christo prepositum ecclesie nostre infula per sedem apostolicam insigniri ac tuos inposterum successores, cum etiam de sedis apostolice benignitate cyrotecis, anulo, scandaliis subtili et dalmatica tam tu quam tui ex ordine successores merueritis exornari, ne virga pastoralis, per quam regimen pastorale plenissime designatur, aliis concessis deesset, cum magis hec nobis opportuna videretur, solita circa prelibatam ecclesiam nostram ac benigna usi largitate auctoritate dei patris et nostra tibi ac tuis deinceps successoribus in perpetuum virgam conferimus pastoralem, ut ea cum predictis ornamentis ad honorem domini perfruaris. Ne autem hec nostra collatio processu temporis oblivione valeat aboleri aut a quoquam occasione qualibet immutari, presentem paginam conscribi ac sigillo nostro fecimus communiri. Dat. Salzburge, anno ab incarnatione domini M°CC°XXX°III°, kalendas novembris, indictione VI^a.||
S.^a)

Source Fulltext: Salzburger Urkundenbuch, III. Band, Urkunden von 1200 bis 1246. Willibald Hauthaler und Franz Martin. S. 448-449.