Frater Otto dei gratia de Traberch nec non et Heinricus filius eius de Truhsen omnibus presentem paginam inspecturis in perpetuum. Quia dominus et in Christo pater dilectus Eberhardus venerabilis Salzpurgensis archiepiscopus et apostolice sedis legatus cultum dei ac honorem ecclesie sue, auxit suis temporibus et dilatavit, prout aparet non in paucis, inter cetera nostris commonitus precibus et inclinatus et motus visceribus pietatis ecclesiam barrochialem in Lauentmunde in nostrum forum Traberch dyocesiana transtulit auctoritate ita, ut totum ius barrochiale, quoquo nomine censeatur, illic simul et plebani residencia requiratur. Deinde cum singulas illius loci circumstantias sua providencia rimaretur et, ut de hiis redditibus, qui quandoque uni non suffecerant, plures persone possent commode sustentari, ut et sic divinum ministerium augeretur, cum et devocio plurium plus obtineat apud deum sua pastorali providencia vigilans procurarit nec non et eandem ecclesiam in sex diviserit prebendas secularium clericorum, qui et illic resideant et omnipotenti deo nocte ac die debitum impendant iugiter famulatum. Unde nos eius paternitatis pro posse nostro volentes providenciam immitari, ut numerus illic augeatur prebendarum, tres capellas videlicet Vroiach et illam sancti Pauli apud Hornberch et Chevsach, in quibus ius habuimus presentandi, cum toto iure earumdem preter ius advocacie, quod tantum nobis reservavimus in eisdem, transtulimus in archiepiscopum memoratum, ut sic stipendiati de proventibus earumdem et quibusdam mansis nunc donatis et adhuc donandis totidem prebende quidquid personis possit secundum mensuram et priorum qualitatem prebendarum commode de hiis sumptibus provideri. Et ne pretextu presentacionis diverse inter sic creatos canonicos generetur disparitas discipline, omne ius, quod habuimus in presentatione illarum prebendarum in eundem archiepiscopum et suos^a) successores loco ecclesie Salzpurgensis transtulimus tali modo, ut presentacio omnium prebendarum simul cum domo nostra et omnibus, que vallo cincta sunt, que etiam tribuimus eidem archiepiscopo, pleno iure ad ipsum tantum spectet et suos successores, qui canonice fuerint substituti. Ut autem hec nostra tradicio a quoquam non possit vel debeat infestari, presentem paginam munimine nostrorum sigillorum cum testium subscriptione fecimus insigniri. Testes sunt hii: dominus Heinricus episcopus Sekowensis, Ortolfus prepositus Soliensis, Otto de Khungesperch, Heinricus Raspo, Engelbertus de Strazpurch, Rubertus vicedominus Frisacensis, Thomas plebanus de Sembriach et alii quam plures.||
Dat. apud Frisacum, anno ab incarnatione domini M°CC°XXXVII°, VIII° idus martii.||
S.^b) S.^c)

Source Fulltext: Salzburger Urkundenbuch, III. Band, Urkunden von 1200 bis 1246. Willibald Hauthaler und Franz Martin. S. 474-476.